KRUJË– Personi që shihni në foto është 29-vjeçari Ramazan Sino, i cili mbeti viktimë në atentatin e regjistruar në mesnatë në Larushk të Krujës, ku tre persona i zunë prite Gentian Bejtjes në banesën e tij dhe hapën zjarr. Për pasojë mbeti i vrarë 29-vjeçari ndërsa u plagos djali i Bejtjes, Alvi Bejtja 18 vjeç, i cili ndodhet në spital nën kujdesin e mjekëve në gjendje të rënduar shëndetësore. “Shënjestra” e sulmit ka qenë Gentian Bejtja, por ky i fundit dhe këtë herë i shpëtoi atentatit ndaj tij. Ky i fundit nuk ndodhej në banesë gjatë sulmit.
Mësohet se atyre u është bërë pritë sapo kanë hyrë në oborrin e banesës. Autorët kanë hapur zjarr me breshëri duke lënë të vdekur në vend Sinon dhe plagosur dy djemtë e mitur të Bejtjes, të cilët ndodhen në spital nën kujdesin e mjekëve, njëri prej tyre Alvi Bejtja, 13 vjeç në gjendje të rëndë. Zbardhja e ngjarjes mbetet e vështirë pasi zona nuk ka kamera sigurie pasi ato u hoqën nga Policia në kuadër të operacionit “Fijet”.
Ndërkohë makina e përdorur nga autorët tip “Volsvagen” është gjetur e djegur afër Tapizës. Brenda saj ishin dhe tre kallashnikovët e përdorur. Dhe ata ashtu si mjeti janë djegur plotësisht duke fshirë kështu çdo gjurmë që çon drejt tyre. Policia ka krehur zonën përreth por ende nuk ka asnjë provë që çon drejt atentatorëve apo organizatorët.
Kush është Gentian Bejtja dhe e shkuara e tij kriminale
Gentian Bejtja nuk është në emër i panjohur pë Policinë dhe drejtësinë si dhe ia ka dalë ti shpëtojë disa atentateve kundër tij. Bejtja u qëllua me armë zjarri së bashku me Klodian Stafukën mbrëmjen e 9 Janarit 2022. Ata u qëlluan teksa lëviznin me makinë pranë shkollës së fshatit Larushk në zonën e Fushë Krujës, ndërsa Bejtja mbeti i plagosur në krah.
Në shtator të vitit 2016, ndaj tij është organizuar një atentat me tritol. Bejtja po udhëtonte me makinën e tij tip “Tuareg”, me targë “AA 020 BH”, në fshatin Nikël të Krujës, kur nga poshtë mjetit shpërtheu eksplozivi që e dëmtoi rëndë në këmbë. Gjithashtu, Bejtja ishte personi që së bashku me Enver Stafukën vodhën makinën e përdorur në vrasjen e kryekomisar Dritan Lamajt në vitin 2013.
