TIRANË– Makina që shihni në foto është “Range Rover-i” që është përdorur nga autorët e sulmit me armë zjarr ndaj Top Channel ku për pasojë mbeti i vrarë roja i sigurisë Pal Kola. Mjeti rezulton të jetë në pronësi të Ramadan Nikollit, një qytetar nga Kosova që në vitin 2020 ishte për pushime në plazhin e Talës, në Shëngjin, Lezhë. Arbresh.info shkruan se ka kontaktuar me Nikollin, i cili më 10 korrik të 2020-ës ka denoncuar vjedhjen e makinës së tij.
Ramadan Nikolli: Range Rover” me të cilin dyshohet se u sulmua “Top Channel” mbrëmë, ka qenë vetura ime, por që më është vjedhur nga rojtari i sigurisë së hotelit ku po qëndrojë me pushime atëherë. Unë i kam pa lajmet që vetura ka qenë me targa të huaja në momentin kur është gjet e djegur pas sulmit që ka ndodhur. Ato targa nuk e di kur ia kanë nxjerrë, që po më duket kanë qenë angleze, por, mu kur ma kanë vjedhë veturën para tre vjetëve, targat e saj kanë qenë 01, pra, të Kosovës.
