TIRANË– Janë zbardhur detaje nga arrestimi i efektivit të RENEA-s Altin Morina pasditën e kësaj të marte në Tiranë. Në një njoftim zyrtar blutë e kryeqytetit bëjnë me dije se në makinën e Morinës tip “Audi” u gjetën mbi 113 mijë euro të mbështjella me qese. Po ashtu shtohet se prerjet e kartmonedhave kanë qenë me prerje shqiptare dhe angleze. Paratë janë gjetur në sediljen e pasagjerit. Arrestimi i efektivit u bë në kuadër të operacionit “Shqiponja”.
Paratë e gjetira dyshohet se kanë ardhur nga veprimtaria kriminale e shitjes së lëndëce narkotike por nuk përjashtohen edhe pista të tjera. Dyshohet se Morina gjatë paraditës së kësaj të marte është shoqëruar me një person të dyshimtë që dyshohet se mund të ketë pasur lidhje me masakrën e ndodhur dy ditë më parë në zonë e “Don Boskos”.
NJOFTIMI I POLICISË:
DVP Tiranë. Finalizohet nga Forca e Posaçme “Shqiponja” operacioni policor i koduar “Fast”, falë inteligjencës informative.
Vihet në pranga për pastrim të produketeve të veprës penale, fshehje e të ardhurave dhe shpërdorim detyre një 43-vjeçar, punonjës policie në Repartin Renea. Sekuestrohen në cilësinë e provës materiale shuma të madhe në euro, paund e lekë shqiptare. Mesditën e sotme, falë inteligjencës informative se një shtetas (punonës police), qarkullonte me automjet tip “Audi” dhe kishte me vete sasi të konsiderueshme parash, menjëherë shërbimet e Forcës së Posaçme “Shqiponja”, kanë organizuar dhe finalizuar operacionin policor të koduar “Fast”. Në kuadër të këtij operacioni, te Kodra e Diellit, shërbimet e Forcës së Posaçme Shqiponja kanë konstatuar dhe shoqëruar në ambientet e DVP Tiranë automjetin e dyshuar sëbashku me drejtuesin e tij shtetasin A. M., 43 vjec, banues në Tiranë, me detyrë Shef i Stërvitjes te Reparti Special Renea. Gjatë kontrollit dhe kryrjes së automjetit rezultoi se në serdiljen e pasagjerit, në vendin e parë të automjetit, ndodhej një qese plasmasi brenda të cilës kishte lekë, euro dhe paund. Nga numërimi rezultoi se në qesen e palsmasit kishte rreth 113 mijë euro, rreth 290.00 lekë të rinj dhe 80 paund, të cilat u sekuestruan në cilësinë e provës materiale. Në përfundim të veprimeve të para hetimore të kryera nga strukturat hetimore të DVP Tiranë u bë arrestimi në flagrancë i shtetasit A. M., dhe materialet i kaluan Prokurorisë së Rrethit Gjyqësor Tiranë për veprime të mëtejshme për vepra penale “Pastrimi i produkteve të veprës penale ose veprimtarisë kriminale”, “Fshehja e të ardhurave” dhe “Shpërdorimi i detyrës”.
