FRANCË– Ndërkohë që protestat e dhunshme kanë shkaktuar kaos në rrugët e Parisit pas vrasjes së një adoleshenti nga Policia ka ardhur dhe reagimi i gjyshes së 17-vjeçarit të vrarë. Ajo shprehet se familjarët nuk duan që të ketë proteta të dhunshme, të shkatërrohen dyqanet apo makinat si dhe kanë bërë thirrje për qetësi. Sipas gjyshes së të ndjerit protetsuesit po përdorin vdekjen e 17-vjeçarit si justifikim për protesta të dhunshme. Ajo shton se beson tek drejtësia dhe se polici që vrau nipin e saj do marrë dënimin e merituar.
Gjyshja: Ne nuk duam që ata të shkatërrojnë dyqanet, autobusët dhe shkollat. Po e përdorin Nahelin si justifikim. Ne duam që gjërat të qetësohen.
Policia njoftoi se gjatë natës janë arrestuar 719 persona, në krahasim me 1311 arrestime një natë më parë, në mbarë vendin, pas dislokimit masiv të forcave të sigurisë me synimin për t’i shtypur trazirat më të ashpra sociale në Francë në vitet e fundit. Kjo krizë, e cila u përhap me shpejtësi, paraqet një sfidë të re për udhëheqjen e presidentit të Francës, Emmanuel Macron, si dhe po ekspozon pakënaqësitë e thella për diskriminim në lagjet më të varfra. 17-vjeçari Nahel, vdekja e të cilit nxiti trazirat, u varros të shtunën në një ceremoni myslimane në qytetin e tij të lindjes Nanterre, në periferi të Parisit. Rreth 2.800 njerëz janë arrestuar gjithsej që nga vdekja e Nahelit më 27 qershor. Dislokimi masiv i policisë është mirëpritur nga disa banorë të frikësuar të lagjeve të shënjestruara dhe pronarë dyqanesh, dyqanet e të cilëve janë plaçkitur. Por, ky veprim ka zemëruar më tej ata që e shohin sjelljen e policisë si shkakun e krizës aktuale në Francë. Trazirat ndikuan në agjendën diplomatike të Macron. Zyra e presidentit gjerman, Frank-Walter Steinmeier, tha se Macron telefonoi të shtunën për të kërkuar një shtyrje të asaj që do të ishte vizita e parë shtetërore e një presidenti francez në Gjermani në 23 vjetët e fundit. Macron ishte planifikuar të udhëtonte për në Gjermani më 2 korrik. Qindra policë dhe zjarrfikës francezë kanë mbetur të plagosur nga trazirat që shpërthyen pas vrasjes së Nahelit, megjithëse autoritetet nuk kanë publikuar shifrat për të plagosurit në mesin e protestuesve. Në Guajanën franceze, një 54-vjeçar humbi jetën pasi u godit nga një plumb qorr.
