HOLANDE – Lajm i keq për Holandën. Në prag të përballjes me ‘blutë’, të premten, në Stade de France (20:45), në një ndeshje kualifikuese për “Euro 2024”, Federata Holandeze njoftoi në rrjetet e saj sociale, se në radhët e ‘Tulipanëve’ do të mungojnë pesë lojtarë.
Viktimë e një “infeksioni viral” sipas njoftimit për shtyp, Bart Verbruggen, portieri i ri nga Anderlecht, i cili në moshën 20-vjeçare duhet të ishte pagëzuar me zjarrin, Sven Botman (mbrojtësi qendror në Newcastle United), Joey Veerman (mesfushori i PSV Eindhoven ), Matthijs de Ligt (mbrojtësi i Bayern Munichut) dhe Cody Gakpo (sulmuesi i Liverpool), një zbulim për Holandën në Kupën e fundit të Botës, u larguan nga kampi stërvitor i kombëtares holandeze të enjten në mëngjes. Dy të fundit priteshin të ishin në 11-shen startuese.
Një dhimbje koke e vërtetë për trajnerin Ronald Koeman, i cili përpos të tjerave duhej të përballej edhe me mungesat e mesfushorit të Barcelonës, Frenkie de Jong (kofshë), sulmuesi i Ajaxit, Steven Bergwijn (gju) dhe mbrojtësi i Interit, Denzel Dumfries (i pezulluar).
Për të kompensuar këto mungesa, trajneri tërhoqi rezervat dhe thirri tre lojtarë të rinj: portierin Kjell Scherpen (Vitesse Arnhem), mbrojtësin Stefan de Vrij (Inter Milan) dhe mesfushorin Ryan Gravenberch (Bayern Munich).
“Gravenberch dhe Scherpen, të cilët po stërviten në Spanjë me të rinjtë holandezë, do t’i bashkohen grupit në Paris”,- vazhdoi deklarata. De Vrij i bashkohet edhe përzgjedhjes e cila më pas ka 23 lojtarë. Pas ndeshjes kundër Francës do të rishikohet përbërja e kombëtares së ‘Tulipanëve’. Holanda do të presë Gjibraltarin të hënën për ndeshjen e dytë kualifikuese.
