TIRANË– Ministri i Drejtësisë Ulsi Manja zgjodhi të mos i përgjigjet pyetjes së gazetarëve në lidhje me aksionin e njjë ditë më parë në shtëpinë e të shumëkërkuarit të drejtësisë Ervis Martinaj ku pavarësisht se u gjet një arsenal armësh dhe pajisje dhe veshje policie nuk ka asnjë të shoqëruar. Manja zgjodhi që në këtë rast të ja pasonte topin kolegut të tij Bledi Çuçi, për të cilin tha se është ministri kompetent për Policinë e Shtetit.
Pyetje: Këtë pyetje po ia drejtoj ish-prokurorit Manja dhe anëtarit të qeverisë që është përgjegjësi për rendin dhe sigurinë në vend. Si është e mundur që Policia e Shtetit shkon për kontroll në shtëpinë e një të shumëkërkuari vetëm 5 muaj pasi është zhdukur dhe pavarësisht se gjen një arsenal armësh, nuk ka asnjë të shoqëruar, siç do të ndodhte me çdo qytetar të këtij vendi. A ka policia frikë nga legjenda e Ervis Martinajt?
Ulsi Manja: Dua ta nis tek fillimi i pyetjes, ti iu drejtove prokurorit Manja, por unë jam Ministër i Drejtësisë, i qeverisë Rama. Besoj fort në ndarjen e pushteteve dhe me këtë gjë do të duhet të merren agjencitë ligjzbatuese, kryesisht prokuroria dhe Policia e Shtetit. Edhe për policinë ka një ministër përgjegjës që është kolegu im Çuçi.
