TIRANË– Enkelejd Alibeaj i është përgjigjur “flakë për flakë” akuzave të bëra këtë të premte nga kryetari i Partisë Demokratike Sali Berisha, i cili e akuzoi se ka fshehur dënimin e vëllait të tij për grabitje me armë në Gjermani. Në një reagim në rrjetet sociale Aliebeaj shkruan se tashmë nuk i bëjnë më përshtypje akuzat e dala nga kryedemokrati. Më tej deputeti demokrat shton e ligji për dosjet dhe lustracionin është domosdoshmëri për shoqërinë shqiptare, për të rivleresuar të shkuarën e për të ndërtuar të ardhmen pa pengjet e një të kaluare, duke nënkuptuar në këtë mënyrë Berishën.
POSTIMI:
Akuzat dhe shpifjet në gojën e Sali Berishës, janë refren i njohur në politikën shqiptare. Vazhdoj ti mbetem bindjes se një gjuhë e tillë meriton përçmimin dhe neverinë që tashmë shqiptarët dinë tja japin politikës së vjetëruar. Ajo që Sali Berisha e quan bashkëpunim për ligjin e dosjeve, është thëngjilli që i djeg ish-komunistëve dhe ish-bashkëpunëtorëve të sigurimit të shtetit, që për vite me rradhë përdoren PD-në dhe të djathtën si mburojë të tyren. Akuzat ndaj familjarëve, janë pikërisht rrjedhojë e shkollës politike të komunizmit dhe biografive, që për dhjetra vite persekutuan shqiptarët. Ligji për dosjet dhe lustracionin janë domosdoshmëri për shoqërinë shqiptare. Është mënyra për të rivleresuar të shkuarën, për të ndërtuar të ardhmen pa pengjet e një të kaluare që i ka shkaktuar dëme të mëdha shoqërisë sonë.
