TIRANË– Drejtori i Kabinetit të kreut të Partisë Demokratike Sali Berisha, Akil Kraja ka folur ditën e sotme për garën në bashkinë e Tiranës mes kryebashkiakut aktual Erion Veliaj dhe kandidatit të opozitës, deputetin Belind Këlliçi.
I ftuar në ‘Stay Tuned’ me Valbona Mhillin Kraja u shpreh se qytetarët e Tiranës do të zgjedhin Belind Këlliçin sepse nuk mund ta lejojnë më Erion Veliaj ti vjedhë ata. Ai tha se Këlliçi është një kandidat që sjell forcën dhe energjinë që kërkon Tirana, ndërsa shtoi se Veliaj si Rama është i marrë peng nga interesa okulte.
Këlliçi është një kandidat që sjell forcën, energjinë e rinisë që kërkon Tirana, atë inovacion dhe modernitet që kërkon Tirana. Veliaj si Rama është i marrë peng nga interesa okulte të cilat po i paguajnë çdo ditë banorët e Tiranës. Është rritur taksa pastrimit, metri katror, uji, banorët e Tiranës sot ndjehen të varfër sepse po vidhen me çmime të rritura dhe kam bindjen se banorët e Tiranës në 14 maj do japin një votë ndëshkimi ndaj Veliaj. Nuk besoj se Tirana do ja falë arrogancën dhe vjedhjen që ai po bën me këta qytetarë.
