TIRANË– Kanë nisur tensionet në hyrje të Kuvendit mes deputetëve demokratë që tentojnë të futen në seancë dhe Gardës së Republikës, e cila nuk i lejon. Deputetët kanë kërkuar të marrin pjesë në seancë pasi sipas tyre nëse nuk ka një vendim të Byrosë së Kuvendit vendimi i Komisionit të Etikës nuk ka vlerë. Deputeti Belind Këlliçi ka kërkuar me insistim futjen në seancë. Në një deklaratë për mediat ai u shpreh se kryeministri Edi Rama është “tërbuar” pas skandalit me ish-agjentrin e FBI-së Charles McGonigal.
Belind Kwlliçi: Kjo është një çmenduri e Edi Ramës, kjo është cmenduri e Lindita Nikollës, është e disata herë që unë përjashtohem nga Kuvendi pa folur. A kanë fytyrë këta të dalin përpara njerëzve. Nxjerrin Gardën këtu, nga kush e mbrojnë këta Kuvendin, nga unë? Nga Belind Këlliçi? Pse nuk e ndalojnë këta kryeministrin Edi Rama që vjedh. Kërkojmë fjalën për procedurë nuk na jepet fjala. Unë e di që dosja e McGonigal e ka tërbuar, por nuk do të shpëtojë. Thjesht po shtyn agoninë e tij. Ne duhet të futemi në seancë plenare dhe Garda është këtu për të zbatuar ligjin. Nuk më intereson asgjë, unë aktualisht që po flas duhet të jem në seancë.
