Gazetari i njohur Nikollë Lesi tha për “Tirana Live” në ABC News se viti 2030 do ta gjejë kryeministrin Edi Rama sërish në pushtet me atë opozitë aktuale që ka përballë. Kjo është një mënyrë se si gazetari e analizon gjendjen e opozitës në Shqipëri duke shtuar se vendi ka nevojë për një opozitë të re, e cila duhet të motivojë dhe përbashkojë njerëzit.
Ja si shprehet ai:
“Unë kam bindjen se opozita është në gjendje kaotike, nuk jep shprese, s’jep frymëzim dhe me këtë opozitë Edi Rama ka vitin 2030 në pushtet. Mendoj se dha një dritë shprese në këto ditë që pati një bashkim, ku protagonist ishte Gaz Bardhi, por prapë se prapë me këtë opozitë nuk ka asnjë shpresë që të rrëzohet Edi Rama. Ka nevojë për një opozitë të re, lidership të ri, që t’i mobilizojë njerëzit”.
I pyetur për garën e Kukësit më 24 shtator, Lesi thotë së me gjithë skandalin e ndodhur, PS-ja ka shanse të fitojë sërish bashkinë verilindore.
“Për këtë gjendje kaotike të opozitës nuk ka ndonjë shpresë nëse nuk ka përbashkim forcash. Nuk ngjallin besim, nuk motivon njeri. Edhe Kukësi është një ngjarje [referuar skandalit të Safet Gjicit], që mundet…mundet për arsye se skandali është i përmasave të mëdha, mundet që opozita….pasi Kukësi është bastion i djathtë, por prapë se prapë me përçarjen nuk shoh ndonjë shpresë. Mundet që PS-ja ta marrë sërish Kukësin”.
