“Erion Veliaj, nata e parë në qeli” është tema e kësaj të marte në Quo Vadis nën moderimin e Pranvera Borakajt.
Gazetari i Vizion Plus, Ermal Qori tha se Rama ka pasur një ditë shumë të ngarkuar me takime, disa prej të cilave janë bërë publike.
Qori e sheh reagimin e kryeministrit Rama si një mbrojtje të pastër dhe të drejtpërdrejtë për Veliajn.
Ai deklaroi se pas 5 vitesh, PS theu mitin e ngritur se nuk komentojnë vendimet e drejtësisë.
Sipas gazetarit të Vizion Plus, arrestimi i Veliaj sjell një kosto tek Partia Socialiste, kjo pasi jemi edhe shumë pranë zgjedhjeve. Qori shtoi se Rama e mbrojti kryetarin e bashkisë sepse ende nuk ka një vendim të formës së prerë për të.
Pjesë nga biseda:
Qori: Ishte më 11 maj, Rama gjatë këtyre 24 orëve ka pasur shumë takime. Fakti është që Rama dhe socialistët thyen mitin e ngritur se nuk komentojnë drejtësinë. Rama bëri një mbrojtje të pastër dhe të drejtpërdrejtë për Veliajn.
Borakaj: Pse mendon se e mbrojti Veliajn?
Qori: Nga ajo që shoh, Rama po e bën sepse nuk ka ende një vendim të formës së prerë për Veliajn. Sipas tij, nuk duhet të shkojmë në këtë vendim final. Jemi përpara zgjedhjeve dhe për PS kjo është një kosto.
Vetëm një ditë më parë, kryetari i Bashkisë së Tiranës, Erion Veliaj është arrestuar për veprat penale “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”.
