TIRANË– Ish-ministri i Mbrojtjes Fatmir Mediu ka reaguar për herë të parë pasi Struktura e Posaçme Kundër Korrupsionit dhe Krimit të Organizuar (SPAK) mbylli hetimet për çështjen “Gërdeci” dhe e çoi atë për gjykim në Gjykatën e Posaçme. Në një deklaratë për mediat Mediu e ka cilësuar gjithë procesin si tendencioz. Sipas tij shpërthimi në Gërdec nuk erdhi si pasojë e urdhërave të dhëna nga ministri i Mbrojthjes.
Mediu shprehet se i gjithë procesi i kryer ndaj tij është në kundërshtim me ligjin pasi e njëjta çështje është rihapur tre herë. Ish-numri një i Mbrojtjes deklaron se rinisja e këtij hetimi nga SPAK është e stisur politikisht. Mediu ndër të tjera shprehet se asnjë nga akuzat që rëndojnë ndaj tij nuk është e provuar.
SPAK dorëzoi këtë të mërkurë dosjen për Gjykim në GJKKO. Fatmir Mediu akuzohet për veprat penale: “Shpërdorimi i detyrës”, e kryer në bashkëpunim, parashikuar nga nenet 248 dhe 25 të Kodit Penal, si dhe për kryerjen e veprës penale “Shpërdorim i detyrës” në bashkëpunim me subjekt ushtarak-kuadër komandues, parashikuar në nenet 70/2 e 2 të Kodit Penal Ushtarak dhe neni 25 i Kodit Penal.
DEKLARATA:
Dërgimi për gjykim në GJKKO i çështjes penale në ngarkimin tim, është formalizimi i gjithë veprimeve në kundërshtim me ligjin të kryer nga SPAK në kuadër të hetimeve të rihapura në lidhje me ngjarjen tragjike të Gërdecit. Rihapja e kësaj çështjeje dhe mandej vazhdimi i të ashtuquajturave hetime të kryera nga ana e SPAK, janë akte tërësisht në kundërshtim me ligjin procedural penal si dhe me faktet e provat. Ngjarja tragjike e Gërdecit, ashtu sikurse edhe vetë organi i prokurorisë ka pranuar, nuk ka si shkak urdhërat e Ministrit të Mbrojtjes. Këto urdhëra kanë dalë në bazë dhe për zbatim të ligjit dhe akteve të Këshillit të Ministrave. Detyrimi për kryerjen e demontimit ka buruar nga këto akte dhe nga angazhimet ligjore për anëtarësimin e Shqipërisë në NATO dhe BE. Demontimi i municioneve të tepërta ka qënë një proçes i cili ishte zhvilluar si përpara ngjarjes së Gërdecit, ashtu edhe më pas mbi të njëjtin kuadër ligjor dhe nënligjor. Ngarkimi me përgjegjësi penale i ministrit për çështje që qartësisht janë jashtë kompetencës dhe dijes së tij edhe si ministër, është në kundërshtim të plotë me ligjin.
