TIRANË– Gazetari sportiv Gerti Çarçani foli në “Stay Tuned” me moderatoren Valbona Mhilli mbi emocionet e përjetuara gjatë përcjelljes së ndeshjeve të ekipeve shqiptare në garat europiane në ekranin e MCN TV. Çarçani e konsideroi një diçka të bukur dhe interesante, kontaktin me tifozët, ndërsa theksoi se përgjegjësia ishte maksimale. Pyetjes, si është të përcjellësh ndeshjen përmes stadiumit, Çarçani iu përgjigj:
“Interesante. Është një përvojë tjetër. Kolegët e mi në Supersport, në Digitalb, Tring, Klan, e kanë bërë kohë më përpara, dhe u duket gjë e thjeshtë. Natyrisht, emocionin kryesor ta jep komenti, që ka qenë në komentin e Alban Xhihanit sfidat kryesore, dhe të Gent Alinanit sfidat e Egnatias. Ka qenë diçka e bukur në stadium, kur u bëmë gati Endri Meksi më tha: Gerti tani shijoje, se në aspektin e mbulimin s’kam ndonjë dyshim, frikë apo stepje. Është diçka interesante, e bukur kontakti me tifozët, ngarkesa është kryesore, përgjegjësia është maksimale. Unë s’kam parë asnjë ndeshje, kam qenë au-iu në lëvizje. Për ato detaje që s’shkojnë në syrin e teleshikuesit, por te profesionistit. Edhe pse ishte përvojë e parë dhe mund të na ‘falej’ ndonjë gjë e vogël si për herë të parë. Tirana dhe Partizani kishin diku te 6 mijë tifozë, jo më shumë. E riktheksoj, koha nëpër plazhe e njerëzve e privon këtë gjë, sepse Shqipëri-Moldavi ishte rrafsh. Do shikoni çfarë do ndodhë me Shqipëri-Poloni në shtator, ku që tani kanë filluar të book-ohen biletat online, madje edhe me çmime krejtësisht më të larta të këtyre sfidave”.
Duke folur mbi pritshmëritë për rrugëtimin e ekipeve shqiptare, gazetari tha se ka keqardhje për mënyrën si shkoi ndeshja e Partizanit me Dinamo Batumin.
“Dëshira është për të shkuar sa më larg dhe për të vazhduar me ndeshjet e grupeve. Shanset më shumë i ka Partizani, sepse Tirana ka një kundërshtar të ashpër si Beshiktashi. Kam një keqardhje të vogël për mënyrën se si shkoi ndeshja e Partizanit në Champions me bjellorusët, sepse u shpërdorua pa fund. Megjithatë ajo është histori e mbyllur, futbolli i ka këto”, u shpreh ai.
