TIRANË– Deputeti i Partisë Demokratike Lefter Gështenja ka propozuar sot një nismë për nëpunësin civil ku thuhej se çdo nëpunësi civil ose punonjësi që kryen një funksion jopolitik në administratën publike, i ndalohet të publikojë, reagojë, shpërndajë apo komentojë postime me përmbajtje politike në rrjetet sociale. I pranishëm në Komisionin e Ligjeve Gështenja shtoi se punonjësit civil duhet t’i ndalohet të krijojë grupe komunikimi në platformat elektronike, me qëllim publikimin, reagimin, shpërndarjen apo komentimin e postimeve me përmbajtje politike, të bëra në rrjetet sociale. Por ky propozim ka sjellë diskutime në Komision e Ligjeve ku nuk kanë munguar as ironitë nga socialisti Pandeli Majko. Ai është shprehur se kjo gjë do të ndikonte dhe opozitën, pasi sipas Majkos çdo parti ka simpatizantë në administratë dhe një drejtor që do shohë se një person i ka bërë ‘like’ përfaqësuesit të opozitës, do të procedojë njësoj.
DISKUTIMI:
Lefter Gështenja: Propozimet të dorëzuara zyrtarisht në Kuvendin e Shqipërisë në muajn janar konsistojnë në sanksionimin me ligj të postimeve me përmbajtje politike. Sipas Gështenjës, në nenin 37 “Të drejtat politike”, pas pikës 3, shtohet pikat 4, 5, 6 dhe 7 me përmbajtje: Nëpunësit civil ose punonjësit që kryen një funksion jopolitik në administratën publike, i ndalohet të publikojë, reagojë, shpërndajë apo komentojë postime me përmbajtje politike, të bëra në rrjetet sociale. Nëpunësit civil ose punonjësit që kryen një funksion jopolitik në administratën publike, i ndalohet të detyrojë punonjësit e tjerë apo vartësit e tij të publikojnë, reagojnë, shpërndajnë apo komentojnë postime me përmbajtje politike, të bëra në rrjetet sociale. Nëpunësit civil ose punonjësit që kryen një funksion jopolitik në administratën publike, i ndalohet të krijojë grupe komunikimi në platformat elektronike, me qëllim publikimin, reagimin, shpërndarjen apo komentimin e postimeve me përmbajtje politike, të bëra në rrjetet sociale. Nëpunësi civil ose punonjësi që kryen një funksion jopolitik në administratën publike, që vepron në kundërshtim me pikat 4, 5 dhe 6 të këtij neni, mban përgjegjësi penale sipas nenit 328/a të Kodit Penal. Ky propozim vjen pasi në raportet e Departamentit Amerikan të Shtetit, Komisionit Evropian dhe Misioneve të OSBE/ODIHR është evidentuar në mënyrë të vazhdueshme përdorimi i administratës publike në fushatat zgjedhore nga partitë në pushtet. Veçanërisht, raportet për zgjedhjet parlamentare të vitit 2021, evidentonin përdorimin masiv të burimeve njerëzore dhe të aseteve publike, në favor të partisë në pushtet, Partisë Socialiste. Ndër problematikat e evidentuara, është edhe detyrimi i punonjësve të administratës publike për të pëlqyer, komentuar apo shpërndarë postimet me përmbajtje politike në mbështetje të funksionarëve politikë, partive politike apo kandidatëve zgjedhorë. Kështu, drejtuesit e niveleve të ndryshme të administratës krijojnë grupe në platformat e komunikimit, siç është plaforma Ëhatsapp, me përbërje punonjësit e institucionit përkatës. Këta drejtues apo persona të ngarkuar prej tyre, dërgojnë në grup postime të funksionarëve apo partive politike, me qëllim që punonjësit t’i pëlqejnë, komentojnë apo shpërndajnë në rrjetet e tyre sociale. Në rast se punonjësit refuzojnë apo nuk e kryejnë një veprim të caktuar, ndaj tyre merren masa disiplinore, deri edhe në largim nga puna. Një sjellje e tij përbën një përdorim të qartë të përdorimit të funksioneve publike për qëllime politike, çka është dënueshme penalisht sipas nenit 328/a të Kodit Penal. Të gjithë të anëtarësuarit në platformën Aktiv1sti duhet t’i bëjnë pëlqime, komente apo shpërndarje postimeve të kryeministrit, kryetarit të Bashkisë Tiranë, ministrave, deputetëve dhe drejtuesve të tjerë të Partisë Socialiste. Madje, aplikacioni përmban edhe një sistem pikëzimi bazuar në numrin e reagimeve. Administrata po përdoret për të dhënë një imazh të rremë të mbështetjes politike ndaj qeverisë, por më e rënda është fakti se permes këtij aplikacioni, të gjithë punonjësit e administratës kontrollohen dhe monitorohen deri në dhënien e votës me detyrim për Partinë Socialiste. Kjo praktikë jo vetëm dëmton depolitizimin e administratës, por e shndërron atë në një shtojcë të partisë në pushtet. Me synimin për t’i dhënë fund përdorimit politik të administratës publike, projektligji i propozuar ndalon çdo nëpunës civil apo punonjës që ushtron një funksion jopolitik në administratën publike, që të postojë, reagojë, shpërndajë apo komentojë postime me përmbajtje politike në rrjetet sociale.
Klotilda Bushka: Zoti Majko si relator
Pandeli Majko: Si ndihmës relator…Unë e mirëkuptoj iniciativën e kolegut dhe duke qenë se ka mnjë përvojë modeste në Opozitë, të jem i sinqertë ju them se kam frikë se do ta miratojmë. Besoj e kuptoni që unë e kam me pak ironi. Nëse shikojnë me detaje, qëllimi i mirë që ju keni mund të martohet me një qëllim të keq. Çdo opozitë ka simpatizantë në administratë dhe një drejtor që do shohë se një person i ka bërë lajkë përfaqësuesit të opozitës, këto propozime do jenë njëlloj si Neni 24/1 i Partisë Demokratike, pë rata që s’e dinë është neni që spastronte administratën. Për një ‘like’ do t’i pjellë belaja një specialisti, se me këto propozimi që keni bërë nuk është i rrezikuar një punonjës që bën ‘like’ për Qeverinë, por për Opozitën, do t’ju sugjeroja që ta shikoni nga gota pak bosh…dhe nga ky këndvështrim. Kam përshtypjen që do të keqpërdoren nga qeverisja. O Lefter jam shumë dashamirës, s’kam asgjë.
Klotilda Bushka: Do të kemi mundësi ta diskutojmë më vonë. Zoti Gështenja faleminderit, jeni i lirë të shkoni.
