TIRANË– Struktura e Posaçme Kundër Korrupsionit dhe Krimit të Organizuar ka nisur sekuestrimin e pasurive të shumëkërkuarit të drejtësisë Ervis Martinaj. Raportohet se operacioni i SPAK është përqëndruar në Lezhë dhe në zonën e Fushë Kuqes, ndërkohë që në përfundim të tij do të bëhet edhe bilanci i pronave të sekuestruara. Në “shënjestër” të hetuesve të Prokurorisë së Posaçme janë 34 prona dhe makina në emër të Martinajt dhe të familjarëve të tij. Ish mbreti i lojërave të fatit prej muajsh rezulton i zhdukur dhe askush nuk flet për fatin e tij.
Që prej 11 gushtit ku dhe u denoncua nga familjarët zhdukja e tij fati i Ervis Martinajt mbetet ende një mister. “Mbreti” i lojërave të fatit u shfaq për herë të fundit në një video më datë 22 shtator ku shihej nën shoqërinë e një vajze dhe ish-efektivi i operacionales, Jeton Lami tashmë i arrestuar, në ambientet e një hoteli në plazhin e Durrësit. Që nga ajo mbrëmje askush nuk di të thotë cili është misteri i zhdukjes së tij. Hetimi për zhdukjen e Martinajt, nisi pas informacionit të marrë nga një burim konfidencial, i cili rrëfente se i shumëkërkuari ishte rrëmbyer dhe vrarë nga kundërshtarët.
