TIRANË– Gjykata e Posaçme Kundër Korrupsionit dhje Krimit të Organizuar ka lënë këtë të hënë në burg ish-kryebashkiakun e Kukësit Safet Gjici. Ndërkohë Alma Kaçi, vajza që shfaqet në video-skandalin seksual është lënë në masën e sigurisë “Arrest shtëpie”. Ndërkohë avokatja e Almës ka thënë për mediat në dalje të seancës se i ka kërkuar trupës gjykuese që klientja e saj të ishte pa masë sigurie. Sipas saj ajo ka një djalë të mitur dhe nënë të sëmurë dhe se është e vetmja që sjell të ardhura në shtëpi.
Avokatja: Përfundimisht i kërkova gjykatës që klientja ime të jetë pa masë ose në ndryshim nga arresti shtëpie të jetë me detyrim paraqitjeje. Sepse ka një fëmije të vogël 12 vjeç si dhe ka të nënën sëmurë. Ajo është e vetmja që sjell të ardhura në familje.
Safet Gjici u shfaq në një video-skandal më datë 16 qershor teksa kryente marrëdhënie seksuale me një vajzë në zyrën e tij në Bashkinë e Kukësit. Pas kësaj ai dha dorëheqjen duke pretenduar se i kanë ngritur kurth ndërsa pak orë më vonë ai u shkarkua nga detyra me vendim të Këshillit të Ministrave. Pozitat e Safet Gjicit u rënduan më tej pasi pas aktit seksual ai bisedoi me vajzën për një tender për qentë e rrugës që vajza do ta përfitonte pa u futur në garë. Me sa duket kjo e ka fundosur pozitën e Gjicit që tashmë do të përballet me SPAK. Video-skandali solli reagime të shumta dhe trazoi jetën politike në vend. Ndërkohë zgjedhjet në Bashkinë e Kukësit do të përsëriten.
