Është lënë në fuqi masa arrest me burg për Jamarbër Malltezin lidhur me çështjen e kompleksit Partizani.
“Nuk e dija që armiku isha unë. Procedurat për privatizimin e objektit kanë nisur në vitin 2000. Inventarizimi është firmosur nga kryebashkiaku i kohës Edi Rama, kryeministri aktual”, – tha Malltezi në seancë.
Po ashtu është lënë në fuqi edhe masa detyrim paraqitje dhe bllokim pasaporte për ndërtuesin Fatmir Bektashi.
Në Gjykatë vetë Jamarbër Malltezi i kundërshtoi akuzat. Një gjë të tillë e bëri edhe biznesmeni Bektashi.
Ndërkohë, avokatët e tyre kanë pretenduar se nuk ka vepër penale, ndërsa Malltezi ka kërkuar shfuqizim të masës së sigurimit.
Sipas avokatëve, në veprimet e Malltezit nuk ka vepër penale.
Seanca nisi fillimisht në orën 13:30 të ditës së sotme, por u shty më pas për 2 orë, për shkak se gjykatësit kërkuan më shumë kohë për t’u njohur me dosjen.
Çfarë tha Malltezi në gjyq
“Nuk e dija që isha unë armiku. Të gjitha procedurat për privatizimin e objektit, kanë nisur në vitin 2000. Inventarizimi është firmosur nga kryeministri aktual Edi Rama, që ne atë kohë ishte kryetar bashkie. E gjithë prona nuk ka qenë zonë sportive, siç pretendon Prokuroria, por ka qenë pjesërisht sportive dhe pjesërisht banimi. Zona sportive ka qenë me uzurpues të paligjshëm i cili pretendonte se e kishte të regjistruar shoqëri aksionere KF Partizani. Vetë Ministria e Mbrojtjes në kohën e Pandeli Majkos ka hapur një proces gjyqësor në Gjykatën e Tiranës. Në atë kohë Gjykata shfuqizoi KF Partizanin të regjistrohej si shoqëri aksionere. Unë jam profesor doktor dhe jetoj në Shqipëri edhe pse kam patur mundeësi të largohem. Hetimi prej vitit 2020 po mbahej qëllimisht dhe unë kam qëne në dijeni të këtij procedimi”.
/ Newszone
