Ka përfunduar pak çaste më parë seanca në Gjykatën Speciale për kryebashkiakun e zgjedhur të Himarës, Fredi Beleri.
GJKKO ka vendosur që dosja e Belerit, i cili akuzohet për blerje votash në zgjedhjet vendore të 14 majit, të kalojë për gjykim.
“Beleri nuk ka pse qëndron në burg. Ky gjyq do të zgjasë, do të vijnë të dëshmojnë. S’ka pse qëndron në burg”, ka deklaruar ndër të tjera avokati mbrojtës i Belerit.
Avokati tha se pas këtij vendimi, Beleri “do të vazhdojë të qëndrojë në burg politikisht”.
Seanca ka zgjatur për rreth katër orë, dhe është zhvilluar mes debatevetë forta, ku pala mbrojtëse ka pretenduar për mungesë të provave dhe shkelje të procedurës.
Megjithatë trupa gjykuese ka vendosur ta quajë të vlefshme akuzën e prokurorisë për “korrupsion në zgjedhje”, duke vendosur të mos e pushojë çështjen.
Tashmë Beleri është zyrtarisht i pandehur dhe do të përballet me drejtësinë, në seancën e radhës që do të mbahet ditën e hënë.
Beleri u arrestua në flagrancën natën e 12 majit, pasi kishte premtuar 40 mijë lekë të reja për blerjen e 8 votave. Gjithashtu sipas dosjes së hetuesve, nga përgjimet e kryera, Beleri kishte premtuar 300 eruo shpërblim për sekserin që do të siguronte votat në favor të tij.
Së bashku me Belerin, pas hekurave do të qëndrojë edhe shtetasi Pandeli Kokaveshi.
/ Newszone
