TIRANË– Gjykata Kushtetuese ka rrëzuar kërkesën e ish-anëtarit të Gjykatës së Lartë Admir Thanza. Ky i fundit e humbi betejën në të gjitha shkallët, për pasurinë e tij, e cila u sekuestrua me urdhër të GJKKO-së.
Sipas Thanzës, gjykata ka shkelur të drejtat për të mos u gjykuar dy herë. Ish-anëtari i Gjykatës Kushtetuese pretendonte se Gjykata mori vendim në kundërshtim me ligjin.
Ish-anëtari i Gjykatës së Lartë u mor nën hetim nga SPAK për fshehje dhe mosdeklarim pasurie. Me vendim të gjykatës së Posaçme, iu sekuestruan dyqani dhe apartamenti, 2 pasuri të paluajtshme këto në emër të tij. Në vitin 2018 Thanza u rrëzua nga procesi i Vettingut. Ai u gjet me probleme në të tria kriteret e rivlerësimit, përfshirë atë të pasurisë, e cila, sipas përfundimeve të Komisionit të Pavarur të Kualifikimit, nuk justifikohej me burime të ligjshme.
Thanza u akuzua se ka fshehur një dënim të formës së prerë në Itali me 40 ditë burg dhe 100 mijë lireta gjobë. Dënimi është dhënë në vitin 1999, por ish-gjyqtari tha se kishte marrë përsipër veprimin e ish-kunatës së tij për të shpëtuar jetën e nipit, që kurohej në Itali nga sëmundje e rëndë. Bëhej fjalë për vjedhjen e disa rrobave dhe produkteve kozmetike.
