TIRANË– Gazetarja Blerina Goce, në emisionin “Stay Tuned” me moderatoren Valbona Mhilli në MCN tv, krahas gazetarisë foli edhe për botimin e dy librave të saj studimor letrar. Goce, u shpreh se zgjodhi të botoi një studim letrar mbi erotizmin në letërsinë shqipe, si gjini e cila i ka munguar letrave shqipe. Përmes librit, ajo tha se ka treguar se erotizmi në letërsinë shqipe është i hershëm.
“Fillimisht e nisa me shkrime të përsiatjeve të shkurta, tip esesh dhe poezi në moshë fare të vogël. Pastaj këtu kam përfunduar studimet master shkencor dhe Akademia e Studimeve Albanologjike, për studime letrare dhe vendosa që një gjë që e shihja si një lloj mangësie në studimet letrare shqiptare ishte ajo që lidhej me erotizmin, kështu që vendosa të bëja një studim të kësaj natyre. Ne gjithmonë flasim për poezi dashurie, këngë dashurie, porse nuk kishte një studim të mirëfilltë që të fliste për erosin dhe doja që në një farë mënyre të përvijoja një lloj historie, sado minimaliste apo të shkurtër, në lidhje me erotizmin në letërsinë shqipe, diçka që në fakt ekziston, është i hershëm, që nga këngët folklorike që nga bejtexhinjtë e vazhdon tutje në kohë. Gabimisht mendohet se letërsisë shqiptare i ka munguar erotizmi mbase edhe për shkak të periudhës së komunizmit, kur u zëvendësua letërsia erotike me në lloj letërsie atdhetare dhe dukeshin si shfaqje të huaja dhe dënoheshin, siç ndodhi në fakt në fusha të tjera, në film e në art, por që e vërteta është se erotizmi ka ekzistuar edhe më përpara dhe e risolla. Mendoj se libri është pritur mjaft mirë, këto lloj librash studimore nuk është se lexohen nga masa, por dua të vërej se këto lloj libra janë për të gjitha moshat, edhe për ata që nuk janë studiues letërsie”.
