TIRANË– Fqinjët e Gerti Shehur 31-vjeçarit që goditi me grusht në fytyrë kreun e Partisë Demokratike kanë treguar detaje mbi sjelljen e tij. Në një prononcim për Repport TV, ata shprehen se Shehu konsumonte lëndë të ndryshme narkotike. Një prej tyre thotë se i riu ishte edhe praktikant i besimit islam dhe se gjithmonë i përshëndeste me shprehje fetare.
“Nuk ka pasur probleme të shëndetit mendor. Pinte drogë, hashash po si duket pinte edhe nga ato të tjerat. Po me shumë mundësi konsumonte edhe shumë të tjera. Punonte në disa piceri. Ishte besimtar, sa herë kalonte na përshëndeste me fjalë të besimit islam. Nuk ka qenë person problematik në lagje”, tha ai.
“Më kishte thënë që është i sëmurë ai djali. Këta njerëz ngarkohen vetë, karikohen nga këto llafet. Ndac të djathtët e të majtët kanë gjuhë sherri në parlament dhe këta njerëz ngarkohen psikologjikisht. Është si puna e tifozëve. Një herë e kam parë atë djalin, ka qenë i sëmurë. Mbesa ime më ka thënë që është nga Tepelena, ka familje shumë të mirë. Ai ka vepruar gabimisht”-tha një tjetër prej fqinjëve.
Gerti Shehu goditi me grusht kreun e Partisë Demokratike Sali Berisha ditën e djeshme. Ai u fut mes turmës dhe në një moment u afrua me shpejtësi dhe godtit Berishën. Si pasojë e sulmit kryedemokrati ra përtokë dhe u ngrit i gjakosur në fytyrë dhe me sy të nxirë. Shehu u neutralizua nga truprojat dhe protestuesit në shesh. Më pas ai u arrestua nga Policia. Sipas Policisë ai është person me skedë të pasur kriminale pasi është akuzuar më parë për plagosje, prishje të qetësisë publike dhe trafikim të lëndëve narkotike. Atij iu komunikua masa e arrestit me burg ditën e sotme në Spitalin e Traumës ku ndodhet për të marrë mjekim pasi pas incidentit u dhunua nga protestuesit.
