TIRANË– Policia e Tiranës ka dalë me njoftim zyrtar pak minuta më parë në lidhje me grabitjen me armë zjarri të regjistruar mëngjesin e sotëm në një pikë Exchange në zonën e Astirit. Përmes një njoftimi për mediat blutë e kryeqytetit bëjnë me dije se autori, ende i paidentifikuar ka arritur të marrë nga filiali paratë dhe më pas është larguar me biçikletë. Ndërkohë Policia ka vënë 5000 euro shpërblim për “kokën” e tij dhe ka vënë në dispozicion numrin ku qytetarët mund të telefonojnë nën kushtet e anonimatit.
NJOFTIMI I POLICISË:
Tiranë. Në funksion të hetimeve për zbardhjen e ngjarjes së ndodhur mëngjesin e sotëm, ku një shtetas është futur në një pikë për transferta parash dhe këmbimi valutor në Unazë të Re, dhe nën kërcënimin e një arme zjarri ka marrë një shumë parash dhe është larguar me biçikletë, me qëllim identifikimin dhe kapjen e autorit të dyshuar, Drejtoria Vendore e Policisë Tiranë vë në dispozicion pamjet filmike të ngjarjes. DVP Tiranë fton qytetarët që të japin informacion për autorin e kësaj ngjarjeje dhe vendos shpërblim 5000 euro, për çdo informacion të vlefshëm që do të çojë në kapjen e autorit. Drejtoria Vendore e Policisë Tiranë vendos në dispozicion të qytetarëve, numrin e telefonit 0694110415, duke garantuar anonimatin e plotë të çdo telefonuesi.
