Greisi Koxhaku thyen dy rekorde Kombëtare në Rumani

06/12/2023 17:51

in SPORT

Reading Time: 4 mins read

Në ditën e parë, notarët shqiptarë garojnë me sukses, sot priten kohë të larta

Greisi Koxhaku thyen dy rekorde Kombëtare në Rumani

Menjëherë pas garave të djeshme në Kampionatin Europian, ka reaguar Presidenti i FSHN-së, Agim Çiraku, i cili për gazetën “Telegraf” nuk tregon habi për rezultatet e larta që kanë arritur notarët tanë. “Që kur u nisën për në Europian, unë isha besimplotë se notarët tanë do të tregonin formë të mirë, me rezultate të larta dhe me rekorde kombëtare. Kështu ndodhi, dhe rekordet nuk janë rastësi nga këta notarë, sepse këta kanë qenë më të mirët e vitit 2023 në notin shqiptar. Do kemi edhe në ditët në vazhdim të tjera rezultate të larta, dhe rekorde kombëtare. Unë ju uroj sukses të gjithëve”, kështu reagoi dje Presidenti i FSHN-së, Agim Çiraku.

Agron Kaja

“Në garat e ditës së parë që u zhvilluan sot (dje), të gjithë notarët tanë treguan seriozitet e karakter. Kohët që ata arritën ishin shumë të mira, por do veçoja Greisi Koxhakun, i cili theu dy Rekorde Kombëtare.”

Nga dita e djeshme, në qytetin Otopeni të Rumanisë kanë nisur garat e Kampionatit Europian të Notit, të Rritur- të Rinj (M-F), në pishinën 25m. Këto gara do të zgjasin deri më 11 dhjetor dhe nga Federata Shqiptare e Notit është formuar një grup me 7 notarë, 2 femra dhe 5 meshkuj: Julia Xhako e Vivien Xhemollari për Femra, dhe Greisi Koxhaku, Even Qarri, Ronaldi Serjani, Lajdi Allaraj dhe Joan Meshi për Meshkuj. Notarët shoqërohen nga trajnerët Keisi Fetishaj, Dashamir Bregu dhe Edi Vasi. Edhe në këtë event, notarët tanë nuk e kanë harruar “zakonin” e thyerjes së Rekordeve Kombëtare, ku Gresi Koxhaku mbetet në krye të listës së rekordmenëve të notit shqiptar në Bukuresht. Kështu, në ditën e parë të këtyre garave, notari ynë Greisi Koxhaku zhvilloi dy gara, e njëherësh thyeu dy Rekorde Kombëtare. Në garën 50m Shpinë ai fiksoi kohën rekord 25”49, ndërkohë që në garën e dytë 100m Flutur shënoi kohën e re rekord kombëtar 54”40. Por këto nuk do mbeteshin dy rekordet kombëtare të vetëm në këtë ditë të parë, sepse në Stafetën 4X50m Stil i Lirë për Meshkuj, grupi i notarëve Joan Meshi, Gresi Koxhaku, Even Qarri dhe Ronald Serjani arritën kohën rekord kombëtar 1’37”00. Nga Rumania për gazetën “Telegraf”, trajneri Keisi Fetishi u shpreh i kënaqur me garat e rezultatet e ditës së parë, por sipas tij priten të tjera rezultate rekord. “Në garat e ditës së parë që u zhvilluan sot (dje), të gjithë notarët tanë që garuan treguan seriozitet e karakter. Kohët që ata arritën ishin shumë të mira, por do veçoja Greisi Koxhakun, i cili theu dy Rekorde Kombëtare. Kështu, në garën 50m Shpinë ai shënoi kohën 25”49 (rekord kombëtar), dhe në garën 100m Delfin arriti Kohën 54”80 (rekord kombëtar). Edhe te stafeta 4X50m stil i lirë për meshkuj u thye rekordi kombëtar, ndërsa nesër (sot) do të marrim pjesë në pesë gara, njëra stafetë katërnotim për meshkuj, në të cilat presim rezultate të tjera rekorde kombëtare”, kështu deklaroi dje trajneri Keisi fetishaj nga Otopen të Rumanisë ku janë duke u zhvilluar garat e Kampionatit Europian të Notit në pishinë 25m. Gjithsesi, duhet thënë se këta notarë që po garojnë në këtë Europian kanë arritur rezultate të larta në garat e vitit 2023, madje edhe me rekorde kombëtare të thyera prej tyre.