TIRANË– Gjykata e Apelit Tiranë ka vendosur datën se kur do të shqyrtojë kërkesën e Gerti Shehut, 31-vjeçarit që goditi me grush kreun e Partisë Demokratike Sali Berisha në protestën e 6 dhjetorit. Shehu kërkon që të lirohet nga qelia. Seanca do të zhvillohet të mërkurën, 28 Dhjetor në orën 12:30, ndërsa avokatët e Shehut kanë kërkuar ndryshim mase nga arrest në burg, në arrest shtëpie ose shtrim i detyruar në spitalin psikiatrik.
Gerti Shehu goditi me grusht kreun e Partisë Demokratike Sali Berisha më protestën e 6 dhjetorit. Ai u fut mes turmës dhe në një moment u afrua me shpejtësi dhe godtit Berishën. Si pasojë e sulmit kryedemokrati ra përtokë dhe u ngrit i gjakosur në fytyrë dhe me sy të nxirë. Shehu u neutralizua nga truprojat dhe protestuesit në shesh. Më pas ai u arrestua nga Policia. Sipas Policisë ai është person me skedë të pasur kriminale pasi është akuzuar më parë për plagosje, prishje të qetësisë publike dhe trafikim të lëndëve narkotike. Atij iu komunikua masa e arrestit me burg ditën e sotme në Spitalin e Traumës ku ndodhet për të marrë mjekim pasi pas incidentit u dhunua nga protestuesit.
