MILOT– Portat e HEC-it në Shkopet janë hapur sërish, pasi prurjet në lumin Mat janë shtuar.
Portat janë hapur natën e kaluar dhe për shkak të prurjeve të mëdha janë dëmtuar dy këmbët e urës së Zogut pranë Milotit.
Njëra strukturë e urës ka rënë afër dy metër, ndërsa këmbët e saj ishin të dëmtuara edhe nga prurjet e mëdha vitin e kaluar.
Kompania Kurum hapi portat për të shkarkuar prurjet edhe pak ditë më parë, pa njoftuar banorët e zonave të rrezikuara dhe pa dijeninë e autoriteteve përkatëse.
Ura e Zogut është një nga më të veçantat në vendin tonë për strukturën e saj arkitekturore. Stili i harqeve i japin asaj vlerë muzeore. Ajo është ndërtuar nga një inxhinier italian dhe ka marrë emrin e Mbretit Zog, pasi ai ishte vetë ideatori për ndërtimin e urës. Në ato vite ura ishte një portë e domosdoshme për të hyrë në Shqipërinë e Epërme që përfshin Shkodrën, Lezhën, Mirditën, Tropojën, Kukësin, Pukën.
