TIRANË– Komisioni i Prokurimit Publik (KPP) ka kërkuar që të bëhet rivlerësim për procedurën e prokurimit me objekt “Studim i Fizibilitetit dhe Projekt – Ide për Lidhjen Hekurudhore Durrës -Prishtinë” ankimuar pak kohë më parë nga një prej operatorëve të skualifikuar nga Komisioni i Vlerësimit të Ofertave.
Bëhet fjalë për ankimimin e bashkimit të shoqërive “ILF Consulting Engineers Austria” GmbH & “Abkons” SHPK, që është një nga shtatë kompanitë që morën pjesë në procedurën me fond limit 200 milionë lekë. Procedura e hapur në muajin tetor arriti të kalonte fazën e parë të vlerësimit të ofertave në dhjetor 2022 ku operatori ankimues u njoftua për skualifikim. Në këtë fazë të kualifikuar ishin vetëm dy kompani Tecnica y Proyectos” S.A, Yuksel Proje” A.S.
Duket se një nga shkaqet e skualfiikimit të operatorit ankimues ka qenë i lidhur me dorëzimin e pasqyrave financiare dhe standardin e ndryshëm që aplikohet në Austri. Për këtë Komisioni i Prokurimit Publik ka kërkuar informacion ku ka rezultuar se referuar rregullores së përgjithshme standarde për raportimin ligjor financiar në Austri: kompanitë që operojnë në tregun austriak, e kanë detyrim ligjor të kryejnë raportimin vjetor financiar jo më vonë se 5 muaj nga data e dorëzimit të pasqyrës së bilancit financiar. Data e dorëzimit të bilancit financiar varion nga madhësia e kompanisë dhe statusi juridik.
Komisioni i Prokurimit Publik është ndalur në vendimin e tij pikë pas pike duke sqaruar elementët e nevojshëm që duhet të mbahen parasysh nga Komisioni i Vlerësimit të Ofertave teksa ka nënvizuar se “K.P.P, gjykon se nuk mund të marrë tagrin e Komisionit të Vlerësimit të Ofertave, por në dritën e përgjigjes së dhënë nga Ministria për Evropën dhe Punët e Jashtme, është detyrë e autoritetit kontraktor për një vlerësim sa më të drejtë dhe transparent të rivlerësoje procedurën e prokurimit në përputhje me parashikimet e nenit 92 i ligjit nr. 162/2020 datë 23.12.2020 “Për prokurimin publik” dhe nenin 82 të Vendimit Nr. 285 datë 19.05.2021 të Këshillit të Ministrave “Për miratimin e rregullave të prokurimit publik” të ndryshuar. Sa më sipër pretendimi i bashkimit të operatorëve ekonomik ankimuese qëndron”.
Në këto kushte Komisioni i Prokurimit Publik vendosi të pranojë ankesën e paraqitur nga bashkimi i operatorëve ekonomikë “ILF Consulting Engineers Austria” GmbH & “Abkons” SHPK për procedurën e prokurimit “Shërbim Konsulence”, me Nr. REF- 45735-10-13-2022, me objekt: “Studim i Fizibilitetit dhe Projekt – Ide për Lidhjen Hekurudhore Durrës -Prishtinë”, me fond limit 200,224,996 (dyqind milionë e dyqind e njezetë e katër mijë e nëntë qind e nëntë dhjetë e gjashtë) lekë pa TVSH ose 1.708.696 Euro (një milion e shtatëqind e tetë mijë e gjashtëqind e nëntëdhjetë e gjashtë) Euro kursi i këmbimit sipas Bankës së Shqipërisë datë 07.10.2022, 1 euro = 117.18 lekë, zhvilluar me datë 07.12.2022 nga autoriteti kontraktor, Hekurudha Shqiptare.
“Autoriteti kontraktor të rivlerësojë procedurën e prokurimit objekt shqyrtimi duke respektuar parashikimet e nenit 92 i ligjit nr. 162/2020 datë 23.12.2020 “Për prokurimin publik” dhe nenin 82 të Vendimit Nr. 285 datë 19.05.2021 të Këshillit të Ministrave “Për miratimin e rregullave të prokurimit publik” të ndryshuar.
Autoriteti kontraktor, brenda 5 ditëve, të vërë në dijeni Komisionin e Prokurimit Publik për zbatimin e vendimit, duke dokumentuar veprimet e kryera” thuhet në vendim.
Linja hekurudhore Durrës-Prishtinë është një angazhim i dy vendeve i theksuar në mbledhjet e përbashkëta të qeverive. Ajo vlerësohet me një kosto të përafërt 700 milionë euro ndërkohë që studimi i fizibilitetit që do të zërë vend pas nënshkrimit të kontratës me operatorin fitues do të përcaktojë alternativën më të mirë të gjurmës së hekurudhës./Monitor
