Edhe tre ndeshje finale për kombëtaren shqiptare, për të prekur ëndrrën europiane, “Gjermani 2024”! Interesi i sportdashësve nga të gjitha viset shqiptare është si kurrë më parë. Dy prej takimeve Shqipëria i ka brenda, në stadiumin “Air Albania”, ndërsa jashtë do të luajë në Moldavi, takimin e kthimit.
Fitorja në shtëpi ndaj Polonisë mbrëmjen e 7 shtatorit bëri që shpresat për një kualifikim në Europian të shtohen. Mirëpo entuziazmin e mbështetësve e kanë shfrytëzuar në mënyrën më të keqe zyrtarët e FSHF-së. Brenda dy orësh, pas njoftimit nga ana e Federatës, biletat janë zhdukur nga sistemi i shitjes online.
Për ndeshjen e 12 tetorit Shqipëri-Çeki nuk ka asnjë biletë në shitje! Dikush, ose disa i ka blerë të gjitha ato dhe sot biletat po qarkullojnë në tregun e zi ku shiten 4-5 herë më shtrenjtë se çmimi real.
Përjashto kuotat për Tifozët Kuqezinj dhe ndonjë ftesë që FSHF bën apo shpërndan falas, bëhet fjalë për rreth 20 mijë bileta të tjera që sa zbardhi mëngjesi i së shtunës kanë “avulluar”.
FSHF thotë se janë shitur në kohë rekord, pasi ishin regjistruar mbi 200 mijë kërkesa për 22 mijë vendet e stadiumit. Në këtë situatë të pritshme dyshimet, por edhe përgjegjësia bie mbi Federatën Shqiptare të Futbollit. Dyshimi kryesor lidhet me faktin që vetëm FSHF e dinte orën se kur do të shpallej shitja e biletave dhe veç ajo ka akses në faqen e tregtisë online.
A mos vallë vetë punonjësit brenda Federatës kanë nxituar të bëjnë biznes në tregun e zi?
Gjithashtu, një numri të madh tifozësh që kanë arritur të blejnë mbrëmë bileta me çmimin e zyrtar, sot u ka ardhur e-mail nga sistemi i federatës se blerja iu është anuluar dhe lekët iu janë kthyer mbrapsht, pa asnjë shpjegim shtesë.
Fenomeni i zhdukjes së biletave u pa edhe në ndeshjen me Poloninë dhe u shitën minutat e fundit me çmime marramendëse.
Për ndeshjen me Çekinë, në grupet në Telegram, Whatsapp si dhe Facebook, TikTok e Instagram, biletat po shiten minimum 300 euro një biletë pas porte, e deri në 1 mijë euro për biletat në tribunat kryesore.
Kjo situatë ka sjellë edhe irritimin me plotë të drejtë të sportdashësve dhe mbështetësve të kombëtares. Ndërsa nuk kanë munguar edhe reagimet e zërave publikë të cilët i kërkojnë organeve ligjzbatuese të hetojnë FSHF-në.
Ja si shiten biletat në tregun e zi:
/ Newszone
