TIRANË– I ftuar në emisionin ‘Stay Tuned’ në MCN, me gazetaren Valbona Mhilli zv.ministri i brendshëm Julian Hodaj ka treguar se si është të punosh bashkë me Erion Veliajn. Ai shprehet se Veliaj është një njeri që harxhon shumë orë pune dhe se kur i pari dedikohet aq shumë, nuk i rëndon as të tjerëve.
“Nuk është i rreptë, por dikush që del në zyrë në 6 të mëngjesit dhe ikën pas 12 pritet të të vijë një sms dhe në 2 të natës. Është dikush që harxhon shumë orë pune, ka një vesh shumë të ndjeshëm dhe e ka të qartë se këtë punë për bashkinë e Tiranës do e bëjë për 12 vjet dhe ky është mandati i fundit dhe me këto ritme të çmendura që ka dhe këtë 4-vjeçar do e përballojë më së mirë. Unë jam këshilltar, nëpunës i bashkisë, por e shoh se bashkia punon tmerrësisht shumë. Ai që udhëheq jep shembullin dhe kur i dedikohet i pari aq shumë punës, nuk i rëndon as të tjerëve”.
I pyetur se si e pritet rikandidimin për këshillin, Hodaj tha se për këdo që është në listë përtej renditjes është privilegj dhe përgjegjësi.
“Partia Socialiste është partia më e madhe dhe të jesh një nga ata kandidatë është një nder që i bëhet kujtdo. Nga ana tjetër është një përgjegjësi e madhe i duhet kthyer qytetit me vepra ajo që ai të jep. Prandaj them se ky privilegj që na jep PS dhe votuesit duhet kthyer mbrapsht me shërbime për këtë komunitet që na voton”.
