TIRANË– Ditën e sotme është thërritur në Strukturën e Posaçme Kundër Korrupsionit dhe Krimit të Organizuar (SPAK) Zamira Durda, e cila ka bërë dhe kallëzimin ndaj ish-ministrit të Mbrojtjes Fatmir Mediu. Ajo është nëna e djalit 7-vjeçar, që vdiq nga shpërthimet në Gërdec. Ajo ka bërë përgjegjës ish-ministrin Mediu dhe shprehet se ishte babëzia ajo që mori 26 jetë në Gërdec. Durda shton se nëse drejtësia shqiptare nuk i jep zgjidhje atëherë ajo do të drejtohet në Strasburg.
Zamira Durda: Me sa informacion kam deri në këto momente për akuzë me shpërdorim e detyrës për ne kjo është një vrasje tjetër. Vetëm shpërdorim detyre nuk mund të jetë drejtësi. Kemi 26 jetë të humbura. Çështja ka për të kaluar me argumentime juridike. Unë e kam hapur vetëm me z. Mediu sepse kjo ka qenë e pezulluar. Pjesa tjetër është në dorë të hetuesve të SPAK, ende nuk i ka një hetim për korrupsion. Gjithçka ka ndodhur ka prej babëzisë për para. Korrupsioni dhe babëzia për para sollën atë fatkeqësi të madhe. Pinca, leva dhe sqepar ishin levat e punës. Ministria kishte për detyra të na mbronte dhe jo të na vriste. Ishte urdhri i ministrit që solli të gjitha këto armatime dhe i solli në atë që nuk i kishte kushtet. Unë akuzoj të gjithë piramidën shtetërore. Aty i kanë dokumentet dhe t’i nxjerrin kush i ka firmosur. Unë do t’i vazhdoj të gjitha hapat deri në Strasburg.
Sipas SPAK, Mediu ka shkelur ligjin kur ishte ministër i Mbrojtjes duke shpërdoruar detyrën, veprime të cilat sollën tragjedinë e Gërdecit, ku humbën jetën 26 persona dhe shumë të tjerë i plagosën. Ky është përfundimi që ka arritur pas hetimit disa mujor, Prokuroria e Posaçme (SPAK) për ish ministrin e Mbrojtjes. Ish-ministri si një nga ish-zyrtarët përgjegjës për tragjedinë e Gërdecit. Apeli i GJKKO vendosi hapjen e çështjes duke marrë të pandehur ish-ministrin. Ndërkohë Mediu ka dorëzuar rekursin në Gjykatën e Lartë ku kundërshton vendimin e Gjykatës së Apelit të Posaçëm duke pretenduar se vendimi i Apelit është antikushtetues.
