TIRANË– Ish-deputeti i Partisë Demokratike Belind Këlliçi, i cili humbi garën për bashkinë e Tiranës përballë Erion Veliajt në zgjedhjet vendore të 14 majit deklaroi këtë të martë se Partia Demokratike duhet të bashkohet dhe se demokratët kanë hyrë në një fazë reflektimi. Për mediat teksa ishte duke hyrë në selinë e PD ku po mbahet mbledhja e Kryresisë Këlliçi tha se është koha që të kapërcehen hatërmbetjet.
Belind Këlliçi: Ne në periudhë reflektimi jemi, por kjo s’do të thotë se ka pasur vjedhje të votave. Apo që të gjejmë një socialist të kënaqur për rezultatin, pasi ka pasur vjedhje votash. Ky do të jetë adresim në mbledhjen e kryesisë. Duhet të gjejmë mënyra për të kapërcyer hatërmbetjet. Nuk e di se si mund të lidhet reflektimi me dorëheqjen, pra të shohim se çfarë nuk ka shkuar mirë brenda nesh. Ka ikur koha e interpretimeve personale, gjithçka tjetër i lihet statutit. Do shohim se ça nuk kanë shkuar mirë. Më lejoni që të shkoj në mbledhje. Të mblidhemi dhe të flasim.
