GJIROKASTËR– Një 32-vjeçar i identifikuar me inicialet J.V është vënë në prangat e Policisë së Gjirokastrës këtë të mërkurë pasi dy ditë më parë u përfshi në një aksident ku humbi kontrollin e mjetit dhe u përplas me barrierat. Për pasojë mbeti i plagosur vetë por dhe bashkëshortja e tij, e cila ishte pasagjere. Ai do të akuzohet për veprën penale “Shkelja e rregullave të qarkullimit rrugor”.
NJOFTIMI I POLICISË:
Specialistët e Seksionit të Trafikut Interurban dhe Urban arrestuan në flagrancë shtetasin J. V., 32 vjeç, banues në Nepravishtë, për veprën penale “Shkelja e rregullave të qarkullimit rrugor”, pasi më datë 17.07.2023, duke drejtuar automjetin, ka humbur kontrollin dhe automjeti ka dalë nga rruga duke u përplasur me barrierat mbrojtëse. Si pasojë e këtij aksidenti u dëmtuan drejtuesi i automjetit dhe pasagjerja, shtetasja E. V., 30 vjeçe (bashkëshortja e 32-vjeçarit). Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
