TIRANË– Gjykata e Fierit ka lënë këtë të dielë në burg Orges Bilbilin. Ky i fundit akuzohet si autor i dyshuar për një ngjarje kriminale të regjistruar në vitin 2019. Bilbili aktualisht është duke vuajtur një dënim me burgim të përjetshëm për masakrën e Lushnjës në vitin 2017. Prokuroria e Fierit thotë se ka arritur të dokumentoj që Bilbili, në bashkëpunim me Laert Haxhiun dhe shtetasin Ardian Ahmetaj ekzekutuan me armë zjarri në lagjen “Skënder Libohova” të Lushnjës, shtetasin Besnik Hida, raporton Tv Klan.
Ky i fundit u qëllua në ambientet e një lokali, teksa autorët mbanin maska dhe armë zjarri. Gjithashtu mësohet se Bilbili, i cili është i vetmi i arrestuar në Shqipëri, ka mohuar akuzat para Gjykatës dhe në seancën për vlerësimin e masës së sigurisë, avokati i tij Detar Hysi, tha se nuk ka prova që mbështesin akuzën e ngritur, duke pretenduar se hetuesit kanë përdorur metoda ekstra ligjore.
