TIRANË– Një 21-vjeçar ka rënë në prangat e policisë së Tiranës ndërsa tre të mitur janë vënë nën hetim pasi dyshohet se në bashkëpunim me njëri-tjterin i kanë grabitur me forcë byzylykun një të mituri. Ndërkohë bëhet me dije se një person është arrestuar pasi me para false ka blerë një telefon me vlerë 900 euro në një dyqan.
NJOFTIMI I POLICISË:
Finalizohen nga Komisariati i Policisë Nr. 2, brenda 24 orëve, 2 operacione policore për goditjen e veprimtarisë kriminale në fushën e vjedhjes së pronës dhe pasurisë. Operacioni policor i koduar “Last sale”/ U vu në pranga një 21-vjeçar dhe nisi procedimi penal për 3 shtetas të mitur, pasi dyshohet se i morën me dhunë byzylykun e floririt, një shtetasi të mitur. Procedohet penalisht dhe një shtetase që bleu byzylykun e vjedhur.
Operacioni policor i koduar “Last exchange”/U vu në pranga një shtetas që dyshohet se ka vjedhur sende në një banesë dhe ka blerë një aparat celular me vlerë 900 euro, me kartëmonedha euro të falsifikuara. Specialistët për Hetimin e Krimeve të Komisariatit të Policisë Nr. 2, në vijim të punës për goditjen e paligjshmërisë, pas informacioneve të siguruara përes inteligjencës informative, kanë organizuar dhe finalizuar me sukses operacionet policore të koduara “Last sale” dhe “Last exchange”.
Gjatë operacionit policor të koduar “Last sale”, u arrestua në flagrancë shtetasi F. Ç., 21 vjeç, banues në Tiranë, si dhe nisi procedimi penal për 3 shtetas të mitur (17-vjeçarë), pasi dyshohet se në bashkëpunim me njëri-tjetrin, i kanë marrë me dhunë bylyzykun që mbante në dorë, një shtetasi të mitur. Në vijim të veprimeve nisi procedimi penal edhe për shtetasen A. Xh., 47 vjeçe, pasi i ka blerë këtyre shtetasve byzylykun e vjedhur, me qëllim për ta shitur atë në argjendarinë e saj. Gjatë operacionit policor të koduar “Last exchange”, u arrestua në flagrancë shtetasi B. M., 50 vjeç, banues në Tiranë. Nga veprimet hetimore dyshohet se ky shtetas ka vjedhur 1 laptop dhe sende të ndryshme, në një banesë, në rrugën “Milo Duci”. Gjithashtu, dyshohet se me anë të mashtrimit, i ka blerë një shtetasi, një aparat celular me vlerë 900 euro, duke përdorur kartëmonedha të falsifikuara. Materialet i kaluan Prokurorisë, për veprime të mëtejshme procedurale.
