Një krim i rëndë brenda familjes, i regjistruar paraditen e së shtunës, ka tronditur Tiranën. 40-vjeçarja Marsela Pushani ka vrarë me thikë motrën e saj, Amanda Pushani, 37-vjeçe, pas një debati në banesën e tyre në rrugën “Hajdar Hidri”.
Familjarët fillimisht tentuan ta fshihnin krimin, duke e raportuar në Polici si vdekje natyrale, por uniformat blu konstatuan në trupin e viktimës disa plagë të shkaktuara me thikë.
Pas hetimeve rezultoi se 37-vjeçarja ishte vrarë nga motre e saj, Marsela Pushani, e cila u vu në pranga në akuzën për veprën penale “Vrasja për shkak të marrëdhënieve familjare”.
Shkaku i sherrit mes dy motrave dyshohet të ketë qenë konsumimi i tepërt i alkoolit nga ana e Amanda Pushanit. Mësohet se kjo e fundit ishte e alkoolizuar dhe shpeshherë agresive, duke shkaktuar një konlikt të vazhdueshëm në familje.
Në dëshminë e dhënë në Polici, Marsela Pushani ka deklaruar se vrasjen e ka kryer në kushtet e vetëmbrojtjes, pasi sipas saj, fillimisht viktima ka kërcënuar atë dhe mamanë e saj me thikë se do t’i vriste. Ajo thotë se i kanë kërkuar Amandës që të linte alkoolin dhe kjo gjë ka sjellë përleshjen mes tyre.
“Nuk kam dashur ta vras motrën, veprova në kushtet e vetëmbrojtjes. Prej më shumë se 10 vitesh ishte e alkoolizuar dhe problematike. Mëngjesin e djeshëm kemi pasur debat pasi i kërkonim që të linte alkoolin. Fillimisht Amanda mori thikën dhe më kërcënoi mua dhe mamanë se do të na vriste. Situata u tensionua dhe veprova në kushtet e vetëmbrojtjes”, ka thënë Marsela Pushani në Polici.
Njoftimi i Policisë:
Ditën e djeshme, rreth orës 11:40, është marrë njoftim se në rrugën “Hajdar Hidri”, shtetasja A. P., 37 vjeçe, kishte ndërruar jetë dyshohet për shkaqe natyre.
Pas marrjes së njoftimit, Shërbimet e Policisë kanë kaluar menjëherë në vendngjarje, dhe pas konstatimit të trupit të pajetë të shtetases A. P., 37 vjeçe, e cila fillimisht është raportuar si vdekje natyrale nga familjarët, kanë vijuar veprimet hetimore të thelluara në lidhje me rastin, për të bërë të mundur zbardhjen e rrethanave të ngjarjes.
Pas kryerjes së autopsisë ka rezultuar se shtetasja A. P., 37 vjeçe, ka ndërruar jetë si pasojë e plagëve të marra nga një mjet prerës.
Në vijim të veprimeve, specialistët e Sektorit për Hetimin e Krimeve të Rënda arrestuan shtetasen M. P., 40 vjeç, (motrën e saj), banuese në Tiranë, për veprën penale “Vrasja për shkak të marrëdhënieve familjare”, pasi ditën e djeshme, gjatë një konflikti ka goditur me mjet prerës shtetasen A. P., e cila si pasojë e plagëve të marra, ka ndërruar jetë.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
/ Newszone
