TIRANË– Detaje të reja kanë dalë në dritë në lidhje me 27-vjeçarin Jani Rustemaj, të riut që përfundoi në koma pas arrestimit për vjedhje dhe dërgimin e tij në Komisariatin nr.3. E ëma e tij vijon të kërkojë drejtësi për rastin e të birit si dhe ka bërë kallëzim për kujdes jo të duhur shëndetësor si dhe pretendon se djali I saj është dhunuar. Ndërkohë këtë të mërkurë ka reaguar dhe Qendra Spitalore Univeristare “Nënë Tereza”, e cila shprehet se shkak për gjendjen e të riut të jetë bërë mbidoza e metadonit, që i është dhënë për ta qetësuar nga varësia e heroinës.
Kur Rustemaj u soll në QSUT, thonë mjekët ai ishte në gjendje të rëndë shëndetësor në kushtet e insuficensës respiratore. Prej afro një muaj 27-vjeçari dergjet në koma ndërsa e gjithë ngjarja që solli këtë gjendje është e mbuluar ende me mister. Përmes një njoftimi për mediat pas publikimit të rastin në mediat Policia e Tiranës bëjnë me dije se familjarët e Rustemajt kanë bërë një kallëzim për trajtim jo të mirë shëndetësor. Ndërsa sqaron dhe procedurën e ndjekur për rastin e arrestimit.
Sipas tyre 27-vjeçari është ndjerë keq menjëherë pas shoqërimit për akuzën e vjedhjes. Pasi ka marrë trajtimin thotë Komisariati nr.3 ai është ndjerë më mirë. Por ka shfaqur sërish probleme më datë 16 prill pas daljes para togave të zeza që i caktuan masën arrest me burg. Pas gjendjes së tij të rënduar është thërritur emergjenca dhe ai është transportuar drejt spitalit “Nënë Tereza”.
Ndërkohë më herët nënë e tij ka thënë se nuk është njoftuar për gjendjen shëndetësore të të birit dhe ka akuzuar për në keqtrajtim të tij gjatë apo pas shoqërimit. Ajo thekson se djali nuk vuan nga asnjë sëmundje dhe nuk e lënë as që të hyjë në spital t’i qëndrojë afër.
