MALIQ– Zbardhen detaje nga vetëvrasja e Gjergj Mullallit, 55-vjeçarit që një natë më parë ekzekutoi me armë zjarri bashkëshorten e tij. Përmes një njoftimi për mediat Policia bën me dije se Mullalli ishte fshehur në një banesë të braktisur në fshatin e tij. Kur u rrethua nga Policia, ai nuk pranoi të dorëzohej duke qëlluar disa herë në drejtim të efektivëve. Kur pa se nuk kishte rrugëdalje u vetëvra me armën që një natë më parë vrau dhe gruan e tij Luiza Mullalli.
NJOFTIMI I POLICISË:
Maliq/Informacion shtesë Pas kërkimeve të pandërprera dhe kontrollit të territorit me qëllim kapjen e shtetasit Gj. M., i cili një ditë më parë vrau me armë zjarri bashkëshorten e tij, shërbimet e Policisë të DVP Korçë dhe Komisariatit të Policisë Maliq bënë të mundur lokalizimin në një banesë të braktisur, në fshatin Zëmblak, të këtij shtetasi. Sapo ka konstatuar se ka qenë i rrethuar nga forcat e Policisë 55-vjeçari, ka hapur disa herë zjarr ndaj punonjësve të Policisë. Pas thirrjeve të njëpasnjëshme të Policisë për t’u dorëzuar, ky shtetas është vetëvrarë. Grupi hetimor ndodhet në vendngjarje për të kryer veprime të mëtejshme në lidhje me këtë ngjarje.
