TIRANË– Këshilli i Ministrave ka miratuar disa ndryshime në ligjin “Për nxitjen e Punësimit” në lidhje me punësimin e personave me aftësi të kufizuara në biznese apo kompani me një numër të lartë të punësuarish.
Ministrja e Financave dhe Ekonomisë Delina Ibrahimaj deklaroi se në ligj është përcaktuar qartë procedura për punësimin dhe deklarimin e kësaj kategorie, e cila do të bëhet aktive nga janari i vitit të ardhshëm. Për bizneset që nuk zbatojnë ligjin ka penalizime.
“Ky ndryshim vjen me qëllim vendosjen e një barazie për çështjet sociale. Vjen në zbatim të një neni të veçantë që lidhet me fondin social të punësimit, pra që parashikon të gjithë bizneset me numra të lartë të punësimit duhet me detyrim të punësojnë persona me aftësi të kufizuara. Kjo nuk përkufizohet vetëm te bizneset, bëhet fjalë për të gjithë punëdhënësit. Nëpërmjet ndryshimit ne do të japim një shpjegim dhe procedurë se si do të veprohet për deklarimin e punonjëseve dhe kjo procedure do te jetë aktive që nga janari 2024. Qoftë entet publike apo private do të duhet të punësojnë persona me aftësi të kufizuar ose të paguajnë vlerën e barabartë me pagën minimale dhe të paguajnë kontributet e barabartë me pagën minimale për çdo person që nuk marrin në punë me aftësi të kufizuar”./Monitor
