TIRANË– Mjeku Ilir Alimehmeti ëhstë tërhequr nga balotazhi përballë Belind Këlliçit, i cili mori dhe shumicën e votave në primaret për bashkinë e Tiranës. Në një konferencë nga selia blu Alimehmeti bëri të ditur tërheqjen e tij duke i hapur rrugë zyrtarizimit të kandidaturës së deputetit demokrat Belind Këlliçi përballë kryebashkiakut socialist Erion Veliaj. Ndërsa në fjalën e tij Këlliçi bëri të ditur se Ilir Alimehmeti do të jetë krahu i tij i djathtë në ‘betejën’ për të mundur Erion Veliajn. Sipas Këlliçit nëse kjo bëhet e mundur atëherë mjeku i njohur do të marrë detyrën e nënkryeytarit të bashkisë më të madhe dhe të rëndësishme në vend, bashkisë së Tiranës.
“Jam krenar që kam qënë pjesë e këtij procesi. Ne sjellim një model ndryshe. Në zgjedhjet e primareve, anëtarësia foli’, tha Alimehmeti.
Nga ana tjetër, fituesi i Primareve për Tiranën, Belind Këlliçi deklaroi për mediat se shqiptarët do befasohen nga ky standart që është vendosur në politikën shqiptare.
“Sot shqiptaret janë të befasuar nga ky standard i vendosur në politikën shqiptare. Fokusin kryesor e kam pasur te baza dhe anëtarësia e Partisë Demokratikë. Kjo ka qenë një fushatë civile e qytetare, jemi sërish me njëri-tjetrin. Jam i bindur se ky është një ogur i mirë në politikën shqiptare. Jam krenar që kam qenë pjesë e këtij procesi dhe për ta çuar një standard më tutje ne sot publikisht do adaptojmë një formë amerikane të garës, formën presidenciale. Ashtu si në Amerikë kam kënaqësinë më të madhe sot që kur I kam hyrë këtij rrugëtimi kam qenë I bindur se do ta mundja Veliajn në garën për Tiranën, me Alimehmetin si krahun tim të djathtë dhe nënkryetar të bashkisë së Tiranës që nga 14 maji ne do sjellim një model krejtësisht ndryshe. Falënderoj dr. Ilir Alimehmetin të cilin kam pasur fatin ta njoh para angazhimit tonë në politik. Është fisnik dhe fisnikëroi dhe më shumë garën. më 14 maj do të sjellim një model të të bërit politikë krejt ndryshëm. Falënderoj të gjithë demokratët, të cilët dolën ditën e djeshme dhe pse në kushte të vështira për të votuar. I vetmi lajm i keq sot është lajmi për Erion Veliaj që PD dhe opozita e bashkuar kanë këtë standard. Jam ndier i privilegjuar dhe jam ndjerë krenar që kam qenë në një garë me dr. Ilir Alimehmetin. Nga ky moment fillojmë fushatën së bashku përballë Erion Veliajt.”, tha Këlliçi.
Belind Këlliçit do i duhet të lërë mandatin e deputetit dhe të nisë fushatën për kreun e bashkisë së Tiranës. Gara e primareve në bashkinë e Tiranës ka qenë e fortë, Alimehmeti dhe Këlliçi ishin dy nga kandidatët më të votuar nga anëtarësia e PD. Por pavarësisht se kishte marrë shumicën e votave Këlliçi nuk u shpall fitues dhe kaloi në balotazh me Ilir Alimehmetin, kjo pasi ai nuk mundi të sigurojë mbi 50% të votave të demokratëve. Tashmë Belind Këlliçi është zyrtarisht kandidati i opozitës për bashkinë e Tiranës përballëri Eon Veliajt.
