TIRANË– Seanca e parashikuar për tu mbajtur këtë të enjte për Inceneratorin e Elbasanit është shtyrë. Shkak është bërë mungesa e avokatëve të të pandehurve, ndërkohë që në sallë ishte i pranishëm edhe ish-deputeti socialist Alqi Bllako. Seanca e radhës ëhstë vendosur të mbahet më 8 qershor.
Ndërkohë pas daljes nga Gjykata avokati i Lefter Kokës për mediat u shpreh se ka paqartësi për konkluzionet e akuzës, që i kërkoi kur ka ndodhur korrupsioni gjatë procedurave të përcaktimit të tenderit apo gjatë dhenies së tenderit.
Avokati: Duhet të ketë një rrjedhë logjike në konkluzionet e prokurorisë, në lidhje me pasuritë që dyshohen të përfituara. Lefter Koka është bërë ministër në vitin 2014, kantina nuk mund të lihet në sekuestro sa kohë që është ndërtuar që në fund të viteve 90. Si mund të kërkohet konfiskimi i kësaj prone? Pasuria e sekuestruar është shumë më e madhe se ajo që pretendohet se është përfituar nga korrupsioni, produkti i krimit që kërkon të sekuestrojë prokuroria është i paimagjinueshëm.
Prokuroria e Posaçme Kundër Korrupsionit dhe Krimit të Organizuar ka dhënë më herët pretencat për inceneratorin e Elbasanit, ku kërkon 10 vite burg për ish-ministrin e Mjedisit Lefter Koka, i cili me gjykim të shkurtuar të vuajë 6 vite e 8 muaj burg. Koka akuzohet për “shpërdorim detyre” e kryer në bashkëpunim, “korrupsion pasiv i funksionarëve të lartë shtetërore ose i të zgjedhurve shtetërorë” si dhe “pastrim i produkteve të veprës penale apo i veprimtarisë penale”, kryer në bashkëpunim.
