Incident në konkursin e bukurisë/ Miss Ukraina në një dhomë me Miss Rusinë: Dhimbje, ata janë terroristë

Të dyja u kualifikuan për në finalen e konkursit të bukurisë Miss Grand International në Xhakartë të Indonezisë, të martën e 25 tetorit. Dhe organizatorët i vendosën së bashku në dhomë. Por dy konkurrentet, Olga Vasiliv dhe Ekaterina Astashenkova, janë përkatësisht ukrainase dhe ruse.

Olga, e cila përfaqëson Kievin, e indinjuar protestoi menjëherë me një postim në Instagram:

Nuk dua të rri në një dhomë me një vajzë nga një vend terrorist, që vjen nga ajo copëz e neveritshme e planetit tonë të bukur, Rusia.

Fjalët e saj bënë menjëherë bujë sa që organizatorët e eventit nxituan t’i jepnin Olgës një dhomë tjetër, duke i ndarë dy konkurrentët.

Ndërkohë përfaqësuesja e Rusisë, Ekaterina, i zgjati dorën koleges së saj dhe tha:

Unë jam kundër urrejtjes dhe pro miqësisë, dashurisë dhe paqes në botë. Jam e vetmja nga familja ime që kam lindur në Rusi. Të gjithë të tjerët janë ukrainas.

Nga ana e saj Olga në postimin e saj në rrjetet sociale shkruante se është për paqen dhe dashurinë.

Më besoni, unë jam për paqen, për dashurinë, për miqësinë dhe mbështetjen, por jo për ata që nuk mund t’i fal. Jo për ata që torturojnë vëllezërit dhe motrat e mia.

Jo për ata që morën jetët e kaq shumë shokëve ukrainas. Unë nuk kam asgjë kundër asaj vajze, por nuk mund të mos ndjej zemërim dhe dhimbje kur duhet të ndaj hapësirat dhe kohën me eksponentin e një vendi terrorist si Rusia.

Dhe në konkursin Miss Grand International qëllimi im është t’i tregoj botës vendin tim, shpirtin tonë ukrainas, bukurinë tonë, forcën tonë dhe gjithçka që po durojmë tani. Bota duhet ta dijë tragjedinë tonë.

Pas ndërhyrjes së organizatorëve për ta ndarë nga miss-i rus, Olga komentoi:

Faleminderit të gjithëve, është një hap i vogël por shumë i rëndësishëm sepse tani më shumë njerëz e dinë se çfarë po ndodh dhe cilat janë ndjenjat tona. Nuk do të ndalem së treguari atë që po kalojmë.