Prej kohësh kishte zëra rreth arsimimit të kandidatit për kryetar bashkie të Tiranës, Belind Këlliçi. Ishte Evi Kokalari, e cila herë pas herë e sulmonte për faktin se nuk kishte përfunduar gjimnazin. Kokalari e ka akuzuar nëprëmjet rrjeteve sociale, zotin Këlliçi se kishte një arsim të cunguar. Gjithashtu, edhe brënda Partisë politike në të cilën aderon Këlliçi ka patur thashetheme se ai ka gënjyer për diplomën e tij.
Gazeta shqiptarja.com, në një tjetër investigim, në lidhje me diplomën e Belind Këlliçit, ka publikuar dokumentin e komisionit të njehsimit të diplomave në Ministrinë e Arsimit, sipas të cilit, i është njohur diploma Belind Këlliçit, pa mbaruar ciklin 5 vjeçar, e rrjedhimisht pajisjen me diplomë të shkollës së mesme.
Gazeta thekson se Instituti “Harry Fultz” konfirmoi se Këlliçi ka përfunduar vetëm 4 vite nga cikli 5 vjeçar i Degës Biznes, duke vërtetuar faktin se ai nuk e ka kryer shkollën e mesme (nivelin 4 të kualifikimit) dhe nuk është diplomuar për programin e studimit përkatës. Pra, nuk disponon një diplomë që vërteton përfundimin e shkollës së mesme.
Ndërkaq, po sot, Shqiptarja.com po publikon proces verbalin e Komisionit të Njohjes së Diplomave të Ministrisë së Arsimit, që mban datën 18 nëntor 2010, ku 5 anëtarët e komisionit kanë bërë njohjen e diplomës për Këlliçin. Në këtë proces verbal gjendet edhe Deklarata e Aplikantit, Belind Këlliçi, i cili ndër të tjera deklaron se “Informacioni që kam dhënë në këtë formular ose në ndonjë material bashkëngjitur është i plotë, korrekt dhe aktual”.
Këlliçi ka nënshkruar me dorën e tij këtë deklaratë, duke pranuar se informacioni është i vërtetë dhe i saktë.
Gazeta, thekson më tej se ka qenë Këlliçi, që nuk ka treguar të vërtetën, si universitetit “Coppin University” në Maryland të SHBA, si Komisionin e Njësimit të diplomës.
Ndërkohë, Ministria e Arsimit, siç tregohet nga shkresa e kthimit të përgjigjes nëse Këlliçi e kishte kryer Maturën Shtetërore të vitit 2006, ka qenë në dijeni të faktit se ai nuk e kishte përfunduar shkollën e mesme.
Sipas shqiptarja.com, Këlliçi ka shkelur etikën e mbi tw gjitha ligjin. Madje kjo gazetë shkruan se me zbulimin e këtyre dokumenteve, vihet në dyshim edhe shkollimi i kandidatit të BF.
Shqiptarja.com, shkruan se në regjistrimin në SHBA, Këlliçi është ndihmuar nga vëllai i tij, i cili aktualisht është dhe Anëtar Bordi i Institutit “Harry Fultz”./Shqiptarja.com, Tema
