Një rastësi e çuditshme dhe tepër e pakëndshme ka ndodhur sot në ndeshjet e pasdites në Serinë A, pasi të dy titullarët e mbrojtjes të Kombëtares shqiptare, Ardian Ismajli dhe Berat Gjimshiti, janë dëmtuar dhe kanë lënë fushën e lojës me 4 minuta diferencë nga njëri-tjetri.
Ismajli ishte titullar në ndeshjen e Empolit ndaj Leçes dhe pas një kundërsulmi të miqve, bëri shenjë nga pankina që nuk mund të vazhdonte më duke u shtrirë në tokë dhe kërkuar zëvendësim. AI mori ndihmën e stafit mjekësor, teksa u komunikoi mjekëve se kishte marramendje dhe e pat të vështirë edhe të kthehej në pankinë.
SHIH VIDEON
Paralelisht, Atalanta luante me Udinezen dhe pak minuta pas incidentit të Ismajlit, ishte Gjimshiti i cili u përplas kokë më kokë me një kundërshtar dhe përfundoi i gjakosur në fushë. Mjekët e fashuan, por dukej se mund të kishte një hematomë, ndaj u kërkua edhe zëvendësimi i mbrojtësit tjetër kuqezi në këtë pasdite të pafat për futbollistët e Kombëtares.
SHIH VIDEON
