TIRANË– Kandidati i opozitës për bashkinë e Tiranës Belind Këlliçi zhvilloi një takim me të rinj e të reja, studentë dhe nxënës të Tiranës në selinë qëndrore të Partisë Demokratike. Në vijim të turit “Jam këtu t’ju dëgjoj”u identifikuan problematikat e ndryshme në territorin e Bashkisë Tiranë, si dhe gjenerimin e ideve për programin elektoral të kandidatit opozitar.
Turi i Dëgjimit sipas Partisë Demokratike synon të mediatizojë opinionet e banorëve të Tiranës dhe qëndrimet e tyre kritike ndaj performancës së Bashkisë, si kundërpeshë ndaj kontrollit mediatik dhe censurës që bashkia imponon prej 8 vjetësh nëpërmjet “kronikave të gatshme”.
Belind Këlliçi: Në shumë raste shqetësimet ishin të përbashkëta, Karta jofunksionale e Studentit, vonesat e shpërblimit monetar për studentët ekselentë, korrupsioni në ndarjen në konvikte, pasiguria që shkakton mungesa e ndriçimit publik, infrastruktura rrugore e munguar në shumë njësi të Tiranës. Të rinjtë e Tiranës kërkojnë që bashkia e tyre të ofrojë zgjidhje për problemet e jo t’i mohojë ato.
