TIRANË– Ndërkohë që të rinjtë e Forumit Rinor të koalicionit “Bashkë Fitojmë” bashkë me kandidatin e koalicionit për Bashkinë e Kamzës Arjan Hoxha po protestonin para Komisionit Qëndror të Zgjedhjeve pasi e cilësojnë si të manipuluar rezultatin që nxorri fitues socialistin Rakip Suli, në ambientet e KQZ- shkoi ambasadorja e OSBE-ODIHR në Tiranë Audrey Glover.
Për rreth 50 minuta shefja e misionit të OSBE-së zhvilloi një bisedë “kokë më kokë” me Kryekomisionerin Ilirjan Celibashi. Në dalje të takimit Glover u tregua e rezervuar për mediat duke mos dhënë deklarate dhe detaje nga takimi me Celibashin dhe se për çfarë u diskutua ndërkohë që këto zgjedhje janë kontestuar nga opozita dhe janë cilësuar si të blera dhe manipuluara nga mazhoranca socialiste.
