Në prag të Javës Kulturore të Arabisë Saudite, e cila do të mbahet për herë të parë në Tiranë gjatë datave 16-20 shtator, në Pallatin e Kongreseve, Ambasadori i Kujdestarit të Dy Shenjtërive në Republikën e Shqipërisë, z. Faisal bin Ghazi Hafzi, përmes një njoftimi për shtyp, e vlerësoi këtë ngjarje si një mundësi të shkëlqyer dialogu, shkëmbimi dhe bashkëpunimi në kuadër të marrëdhënieve dypalëshe.
“Organizimi i Javës Kulturore Saudite në Tiranë pasqyron përkushtimin e Mbretërisë së Arabisë Saudite për të ndërtuar ura komunikimi kulturor dhe civilizues me vende të ndryshme të botës, si dhe mishëron vendin e rëndësishëm që kultura zë në Vizionin e Mbretërisë 2030”, thekson Ambasadori Faisal bin Hafzi.
Ambasadori sqaroi se përbën një mundësi për t’i prezantuar popullit shqiptar një pamje të plotë të kulturës saudite, përmes aktiviteteve të larmishme që do të përfshijnë: ekspozita artistike dhe artizanale, shfaqje muzikore dhe teatrale, sesione kulturore, shfaqje kinematografike, si edhe prezantimin e kulinarisë tradicionale saudite me gjithë diversitetin dhe origjinalitetin e saj.
Më tej, ambasadori Hafzi theksoi se organizimi i kësaj jave kulturore vjen në kuadër të forcimit të marrëdhënieve të shkëlqyera midis Mbretërisë së Arabisë Saudite dhe Republikës së Shqipërisë, duke zgjeruar fushat e bashkëpunimit mes dy vendeve për të përfshirë edhe dimensionin kulturor dhe atë të dijes, përveç atyre ekzistuese.
Programi i Javës Kulturore të Arabisë Saudite përfshin një larmi të pasur fushash, që prezantojnë thellësinë dhe diversitetin e kulturës saudite. Muzika dhe artet skenike do të sjellin një bashkim të traditës me ritmet bashkëkohore, ndërsa aktivitetet letrare dhe të përkthimit do të nxisin dialog kulturor përmes zërave nga të dy vendet. Kinematografia do të ofrojë perspektiva të reja përmes shfaqjeve filmike, dhe artizanati së bashku me modën tradicionale do të ringjallin teknika shekullore të trashëguara ndër breza. Vizitorët do të kenë mundësi të shijojnë kulinarinë autentike saudite, të pasur me erëza dhe aroma karakteristike. Po ashtu, rrëfimtaria dhe prezantimi i trashëgimisë kulturore do të sjellin histori të rrënjosura në peizazhet e shkretëtirës dhe qytetet bregdetare, duke krijuar një përvojë të plotë kulturore.
Për Shqipërinë, kjo përbën një mundësi të rrallë për t’u angazhuar me një kulturë që ka qenë e largët, por që rezonon me traditat e përbashkëta mesdhetare dhe lindore.
Java Kulturore e Arabisë Saudite organizohet në kuadë të Javëve Kulturore Ndërkombëtare, nismë e Ministrisë së Ekonomisë, Kulturës dhe Inovacionit të Republikës së Shqipërisë, e cila synon promovimin e dialogut ndërkulturor dhe forcimin e lidhjeve mes shteteve.
