Nuredin Dumani foli për grabitjet e kambistëve në Elbasan, Kavajë dhe Durrës
Është zhvilluar këtë të martë në ambientet e Gjykatës së Posaçme Kundër Korrupsionit dhe Krimit të Organizuar (GJKKO), seanca gjyqësore në kuadër të megaprocesit “Plumbi i Artë”.
Në sallën e gjyqit ishte i pranishëm bashkëpunëtori i drejtësisë, Nuredin Dumani, i cili dha dëshminë e tij, por gjithashtu edhe persona të tjerë që Dumani i ka akuzuar si bashkëpunëtorë. Dëshmia e tij u shoqërua me kundërshti të ashpra nga këta persona, të cilët e ndërprenë disa herë Dumanin, duke krijuar situata të tensionuara në sallë.
Në kulmin e përplasjeve, i akuzuari Petrit Qoli deklaroi: “Nuredin Dumani është krijesa më e shpifur njerëzore që kam njohur në 53 vitet e jetës sime.”
Për të qetësuar situatën, gjykata vendosi ndërprerjen e seancës për disa minuta. Pas rifillimit, seanca vijoi nën masa të forta sigurie, ndërsa tensionet mes palëve mbetën të larta.
Nuredin Dumani, në vijimin e dëshmisë së tij, foli për grabitjet e kambistëve në Elbasan, Kavajë dhe Durrës. Sipas dëshmisë së Dumanit, këto grabitje janë kryer në bashkëpunim me Talo Çelën, Ilirjan Feçin, Gentian Sharrën dhe persona të tjerë të përfshirë në veprimtari kriminale.
“Tek grabitja në Kavajë, Talo i ra me levë në kokë kambistit. Atij iu thye nofulla dhe nuk fliste dot. Morëm çantën, u larguam dhe më pas ndamë lekët, rreth 20 milionë.”, tha Dumani.
