TIRANË– Jo vetëm ish-zyrtarja e lartë në Kryeministri Alda Klosi por dhe i vëllai i saj Leonard Ciko ka rënë pre e vjedhjes së pastrueses Rozeta Dobi. Kështu ai ka denoncuar në polici se Dobi nuk i ka vjedhur para por vetëm bizhuturi dhe sende me vlerë. Ai ka njohur një unazë, varëse dhe një byzylyk nga sendet që janë gjetur në banesën e Rozeta Dobit dhe që janë sekuestruar si prova materiale.
Vjedhja ka ndodhur më datë 15 dhjetor kur në shtëpi nuk ndodhej askush. Rozeta Dobi punonte si pastruese në shtëpinë e ish-zyrtares së lartë në Kryeministri. Paratë janë vjedhur në kohë të ndryshme. Pasi kishin kryer grabitjen e fundit Dobi dhe i biri Havier Dobi e kthyen shtëpinë “përmbys” për ta bërë të dukej si grabitje. Pas kontrollit në shtëpi atyre iu gjetën dhe 404 mijë dollarë të tjerë, mijëra euro dhe bizhuteri, të cilat ishin fshehur në tubin e aspirimit. Rozeta e Havier Dobi e pranuan krimin para uniformave blu. Havieri me paratë e vjedhura kishte blerë makina luksi, të cilat i ekspozonte në rrjetet sociale. Por pre e vjedhjes së Rozetës janë dhe personazhe të tjerë të njohur e të panjohur për publikun. Një ndër ta është dhe Leonard Ciko, një biznesmen në Tiranë që rezulton të jetë dhe vëllai i Alda Klosit (Ciko).
