Ishte vizita e Erion Veliajt në Kanada, që risolli foto të çiftit të famshëm të artistëve Xhoi e Gent Bejko. Për të gjithë nostalgjikët e fillim viteve 2000, këto foto kanë një rëndësi të veçantë. Ishte një kohë kur Xhoi këndonte në programet e Top Chanel, kurse Genti bënte humor në Portokalli e luante në Teatër.
Xhoi dhe Genti, bashkë me dy fëmijët e tyre janë shpërngulur prej gati 10 vitesh në Kanada dhe atje të dy janë vazhdimisht të përfshirë të projekte artistike për komunitetin e shqiptarëve atje.
I njëjti komunitet që mikpriti kryebashkiakun Veliaj, i cili ndodhet në Otava të Kanadasë, përpara se të niset për në Toronto, ku do të mbajë një fjalë si i ftuar në Forumin Urban Botëror. Ai u prit dje nga komuniteti shqiptar në Otava dhe mori pjesë në çeljen e ekspozitës “Diplomart”, e realizuar nga artistët shqiptaro-kanadezë, Entela Konomi, Kastriot Dervishi dhe Altin Muciqi.
“E falenderoj shumë ambasadorin sepse sot ambasada është kthyer në një shtëpi të të gjithë shqiptarëve. Fakti që këtu kemi një vatër, një strehë, një derë të hapur është një arritje shumë e madhe. Kjo ekspozitë është si një gur i hedhur që bën rrathë dhe jep shpresë, lëviz pak komunitetet, ndaj sot kam vetëm mirënjohje për të gjithë artistët tanë. Jam shumë i impresionuar për faktin se sot bashkohemi nëpërmjet artit. Ka disa njerëz që sportin e cinizmit e kanë shumë pasion dhe në fakt është një pak sport ballkanik, por unë besoj fort se një nga pasaportat tona më të mëdha e më të vyera është pasaporta e artit dhe kulturës”, tha Veliaj.
