KORÇË– Juglindja e vendit është zgjuar ditën e sotme nën “pushtetin” e mjegullës. Si pasojë kalimi në disa akse të zonës është tejet i vështirë, disa prej akseve janë të pakalueshme nga dendësia e mjegullës që mund të bëhet edhe shkak për aksidente. Automjetet që kalojnë përmes akseve rrugore Pogradec-Korçë dhe Korçë- Devoll duhet të devijojnë në rrugë alternative, në mënyrë që të shmangin aksidentet me rrezik për jetën e udhëtarëve.
Fluksi i lartë i automjeteve që kalojnë në këto akse dhe për shkak të largimit të emigrantëve drejt Greqisë aty ku dhe jetojnë e punojnë rrit rrezikshmërinë për aksidente por deri më tani nuk është raportuar asnjë i tillë. Policia ka përsëritur apelin për drejtuesit e mejteve dhe u ka bërë thirrje që të jenë të kujdesshëm dhe të shmangin akset me mjegull të dendur.
