TIRANË– Lorenc Hasrama është personazhi i radhës, i cili ka rënë pre e kamerës gazmore të “Piranjave”. Këngëtari i baladave të dashurisë, i qindra eventeve muzikore brenda dhe jashtë vendit, së fundmi edhe konkurrent i “Big Brother Vip” është përfshirë në një situatë, në të cilën luhet emri dhe karriera e tij. 24-vjeçari, i cili deri më sot ka thyer vetëm zemra vajzash me këngët e tij, duket se ka thyer edhe ligjin.
Shkak i këtij telashi të Hasramës është bërë një vajzë e quajtur Dorela dhe e shkuara e saj e errët. Të dy janë njohur më herët nga disa miq të përbashkët. Për këtë arsye, ajo i kërkon ndihmë Hasramës, për t’u bërë këngëtare.
Por Dorela, përveç emrit me tri nota muzikore, s’ka asnjë lidhje me muzikën. Sikur të mos mjaftonte mungesa e talentit, mikesha e këngëtarit akuzohet për vjedhje nga personazhe të tjerë të kësaj historie. Në piceri mbërrin edhe një përfaqësues i ligjit, i cili i komunikon Lorencit se do ta çojë në rajonin e policisë.
Madje, shefi i bluve arrin në pikën sa akuzon direkt këngëtarin. Ky i fundit, i ndodhur nën presion jep alibi të ndryshme, se ku ka qenë kur ndodhi vjedhja. I acaruar nga e gjithë kjo histori, Lorenci kërkon ndihmën e shokëve, por në ato çaste vajza ia zgjat vuajtjen duke pranuar vjedhjen.
Ky është momenti që “Piranjat” e njoftojnë se bëhet fjalë për një shaka miqësore./Syri Tv
